اسلام آباد:(اڱارو 09 سيپٽمبر 2025ع)وزيراعظم شهباز شريف ۽ قطر جي امير شيخ تميم بن حمد الثاني ٽيليفون تي ڳالهه ٻولهه ڪئي.
وزيراعظم آفيس موجب، اسرائيلي بمباري جي نتيجي ۾ قيمتي جانيون ضايع ٿيون ۽ شهرين جي ملڪيت کي نقصان پهتو. وزيراعظم دوحا ۾ اسرائيلي بمباري جي سخت مذمت ڪئي ۽ قيمتي جانين جي نقصان تي افسوس جو اظهار ڪيو.
وزيراعظم شهباز شريف قطر جي امير، قطري شاهي خاندان ۽ قطري عوام سان همدردي ۽ يڪجهتي جو اظهار ڪيو ۽ چيو ته اسرائيلي حملو هڪ بزدلانه ۽ قابل مذمت عمل هو.
شهباز شريف چيو ته اسرائيلي جارحيت قطر جي خودمختياري ۽ سالميت جي واضح خلاف ورزي آهي، ۽ اسرائيلي ڪارروايون خطي جي امن ۽ استحڪام لاءِ سنگين خطرو آهن.
وزيراعظم هڪ واضح موقف اختيار ڪيو ۽ چيو ته پاڪستان قطر سان گڏ پٿر وانگر بيٺو آهي، مسلم امت کي هن نازڪ موڙ تي متحد ٿيڻ جي ضرورت آهي.
قطر جي امير پاڪستان جي حمايت لاءِ شڪرگذاري جو اظهار ڪيو، ۽ پاڪستان ۽ قطر جي اڳواڻن علائقائي امن ۽ سلامتي لاءِ رابطي ۾ رهڻ تي اتفاق ڪيو.
0 تبصرے
Do not use vulgar language