غزہ:(اربع 03 سيپٽمبر 2025ع)غزه ۾ اسرائيلي فوج جي ظلم ۽ بربريت جاري آهي، تازين حملن ۾ 100 کان وڌيڪ فلسطيني مارجي ويا آهن.
طبي ذريعن موجب، اڱاري جي صبح کان وٺي غزه ۾ اسرائيلي حملن ۾ گهٽ ۾ گهٽ 105 فلسطيني مارجي ويا آهن.
انهن شهيدن ۾ 32 ماڻهو اهي به هئا جيڪي مرڪزي ۽ ڏکڻ غزه ۾ امداد ڳولي رهيا هئا.
الجزيره جي مطابق، ڏکڻ غزه جي المواسي علائقي ۾ پاڻي جي ورڇ واري مرڪز تي اسرائيلي ڊرون حملو پڻ ڪيو ويو. ڪيترائي ٻار مارجي ويا. زخمين کي النصر اسپتال منتقل ڪيو ويو.
اسرائيلي فورسز دعويٰ ڪئي آهي ته انهن حماس جي هڪ ميمبر حازم نعيم کي قتل ڪيو آهي، جنهن تي غزه ۾ ٽن اسرائيلي قيدين کي رکڻ جو الزام هو.
بهرحال، حماس اڃا تائين هن دعويٰ جو جواب نه ڏنو آهي.
ٻئي طرف، غزه جي صحت واري وزارت موجب، گذريل 24 ڪلاڪن ۾ غزه ۾ 3 ٻارن سميت 13 وڌيڪ فلسطيني بک ۽ غذائي کوٽ سبب فوت ٿي ويا.
اهڙي طرح، جنگ جي شروعات کان وٺي غزه ۾ بک سبب فوت ٿيندڙن جو ڪل تعداد 361 تائين پهچي ويو آهي، جن ۾ 130 ٻار به شامل آهن.
ان دوران، اسرائيلي ريزرو سپاهين غزه ۾ نتنياهو جي جنگ کي غير قانوني قرار ڏنو آهي.
اسرائيلي ميڊيا موجب، 300 کان وڌيڪ سپاهين ڊيوٽي تي رپورٽ ڪرڻ کان انڪار ڪيو آهي ۽ اسرائيلي اڳواڻن کان جوابدهي جو مطالبو ڪيو آهي.
0 تبصرے
Do not use vulgar language