مورو:(خميس 28 آگسٽ 2025ع)اين پي پي سربراھ غلام مرتضي جتوئي ۽ مسرور جتوئي محبت ديرو ٿاڻي تي پوليس مقابلي واري ڪيس ۾ ٿرڊ ايڊيشنل سيشن جج نوشهروفيروز جي عدالت ۾ پيش ٿيا. عدالت ٻڌڻي 17 سيپٽمبر تائين ملتوي ڪري ڇڏي، جڏھن ته مورو ميونسپل ڪاميٽي جي پلاٽ جي ڪاغذن ۾ ڦير ڦار واري ڪيس جي ٻڌڻي اينٽي ڪرپشن جي خاص عدالت ۾ ٿي، جتي پڻ عدالت ٻڌڻي 17 سيپٽمبر تائين ملتوي ڪري ڇڏي. ٻئي پاسي اين پي پي سربراھ غلام مرتضيٰ جتوئي عدالت ٻاھران ميڊيا سان ڳالھائيندي چيو ته اڄ عدالت ۾ ڪيس ڪو نه ھليو ۽ ٻيھر تاريخ ملي آھي. سڀاڻي اي ٽي سي جا ڇهه ڪيس لڳل آھن. ھن چيو ته راڻيپور جي ختم ٿيل ڪيس خلاف سرڪار اپيل داخل ڪئي آھي. جنھن ڪيس ۾ فريادي عدالت پھچي ٻڌايو ھو ته مان مرتضيٰ خان کي پھريون دفعو ڏٺو آھي. ھن چيو ته جونيئر ذوالفقار اسان وٽ صلاح مصلحت لاءِ آيو ھو ۽ ان سان سنڌ ۽ ملڪي سياسي صورتحال تي ڳالهيون ٿيون. ھن چيو ته ڀٽو خاندان سان اسان جو چئن پيڙھين کان تعلق آھي. 1924 جي اسيمبلي ۾ منھنجو پڙڏاڏو ۽ شاھنواز ڀٽو ميمبر ھئا. ھن چيو ته ٻن هفتن ۾ فاطمه ڀٽو اچڻ واري آهي ۽ فاطمه جي اچڻ بعد ھو پارٽي جو اعلان ڪندا. ھن چيو ته سنڌ جي سڀني پارٽين کي گڏجي اتحاد ڪرڻو پوندو. جيڪڏھن پ پ مخالف پارٽيون ڌار ڌار اميدوار بيھارينديون ته پ پ مخالف ووٽ ورهائجي ويندو. پ پ مخالف ووٽ ورھائڻ جو فائدو وري پ پ کي پوندو. ھن چيو ته نوان صوبا ٺھڻ وارين ڳالهين جي ذميوار پ پ آھي. ڇاڪاڻ ته بيڊ گورننس ۽ ڪرپشن سبب اھي ڳالھيون ٿي رھيون آھن. ھن چيو ته عمران خان مقبول اڳواڻ آھي ۽ ملڪ ۾ صاف ۽ شفاف اليڪشن ٿي ته عمران پنجاب ۽ ڪي پي ڪي مان 70 سيڪڙو سيٽون کڻندو. ھن چيو ته زين شاھ جي مورو ۾ رٿيل ريلي جي حمايت ڪيون ٿا.
0 تبصرے
Do not use vulgar language