جعلي ڪاغذن تي ٿيل الاٽمينٽون رد: اينٽي ڪرپشن پاران جاچ شروع، ذميوارن خلاف ڪارروائي جي سفارش

ڪراچي:(آچر 17 آگسٽ 2025ع)سنڌ حڪومت جي ليڊ يوٽيلائيزيشن کاتي عوامي شڪايتن کان پوءِ زمين جون جعلي زمين الاٽمينٽون رد ڪري ڇڏيون آهن، اينٽي ڪرپشن کاتي جاچ شروع ڪري ڇڏي آهي. ان ڏس ۾ ڪراچي جي ضلعن ۾ زمين جي اهڙين ڪيترين ئي الاٽمينٽن کي رد ڪيو ويو آهي، جيڪي “جعلي، ڪوڙن ۽ فرضي” دستاويزن جي بنياد تي ڏنيون ويون هيون. لينڊ يوٽيلائيزيشن کاتي ۽ اينٽي ڪرپشن جي وچ ۾ ٿيل سرڪاري خط و ڪتابت موجب ڪيترن ئي بااثر ماڻهن ۽ گروپن گذريل ڏهاڪن کان وڌيڪ عرصي ۾ جعلي ڪاغذن جي ذريعي وڏيون وڏيون زمينون الاٽ ڪرائي ورتيون هيون، لينڊ يوٽيلائيزيشن کاتي تصديق ڪئي آهي ته تقريباً سڀني ڪيسن ۾ کاتي جي ريڪارڊن ۾ اهڙين الاٽمينٽن جو ڪو به رڪارڊ موجود نه هو. جڏهن ته عوامي شڪايتن کان پوءِ اينٽي ڪرپشن اسٽيبلشمينٽ (ACE) ڪيترين الاٽمينٽس جي جاچ جي شروعات ڪندي زميني داخلا رد ڪرڻ ۽ ذميوارن خلاف قانوني ڪارروائي جي سفارش ڪئي آهي. ڪيماڙي ۾ عبدالغني ۽ عبدالله داداڀائي جي 550 ايڪڙ الاٽمينٽ رد ڪراچي: رد ٿيل الاٽمينٽ ۾ ضلع ملير جي ديه بيل/بوئل ۾ 200 ايڪڙ تي 99 ورهين جو ليز ورتو ويو، جيڪو مبينا طور مسز فاطمه زال يار محمد شاهه جي نالي تي ڏنو ويو هو، ان کي جعلي قرار ڏيندي رڪارڊ آف رائيٽس ۾ داخلا رد ڪئي وئي، جڏهن ته اينٽي ڪرپشن جي جاچ جاري آهي.ڪراچي جي ديهه ٻٻراڻو ۾ يوسف خان ولد منهاج خان جي نالي تي 2 ايڪڙ ليز وارو فائيل جعلي ثابت ٿيو. جاچ مڪمل ٿي چڪي آهي ۽ معاملو هاڻي کليل جاچ لاءِ ACC-I ڏانهن موڪليو ويو آهي. ڪراچي جي ديهه ٽوري ءَ ۾ 2008 ۾ امان الله ابراهيم جي نالي تي 24 ايڪڙ جي ريگيولرائيزيشن آرڊر کي ڪوڙو ثابت ڪري منسوخ ڪيو ويو. داخلا رد ڪئي وئي آهي ۽ ڪيس ACC-II ڏانهن موڪليو ويو آهي. ضلعي ڪراچي ديهه کارکارو ۾ محمد عبدالله جي نالي تي 6 ايڪڙ جي الاٽمينٽ جعلي نڪتي. معاملو سنڌ هاءِ ڪورٽ ۾ زير التواءَ آهي. ڪيماڙي ضلعي جي ديهه لال بکر ۾ 550 ايڪڙ تي ٻن وڏين الاٽمينٽن کي، جيڪي ايم/س عبدالغني دادا ڀائي ۽ ايم/س عبدالله دادا ڀائي جي نالي تي هيون، رد ڪري داخلا پڻ رد ڪئي وئي. ديه ڪنڪر ۾ عبدالقدير خان دراني جي نالي تي ڪيترين الاٽمينٽن کي جعلي قرار ڏئي ريڪارڊ مان ڪڍي ڇڏيو ويو. ڪيس ACC-I ڏانهن وڌيڪ ڪارروائي لاءِ موڪليو ويو آهي. ديه صلبارڻي ۾ لبوع جي نالي تي 12 ايڪڙ جعلي ڪاغذن سان ريگيولرائيز ڪئي وئي، جيڪا منسوخ ڪئي وئي آهي، پر معاملو هاءِ ڪورٽ ۾ زير ٻڌڻي آهي. بااثر بلڊرز، ڪرپٽ ڪامورن ۽ جعلي نوٽيفڪيشنن ذريعي زمين ريگيولرائيز ڪرائي ڪراچي: اختيارين جو چوڻ آهي ته اڪثر الاٽمينٽون تڏهن سامهون آيون، جڏهن متاثر شهرين ۽ شڪايت ڪندڙن اينٽي ڪرپشن کي آگاهه ڪيو ته سرڪاري زمين تي قبضو يا جعلي ريگيولرائيزيشن ٿي رهي آهي. ان کان پوءِ لينڊ يوٽيلاص کاتي پنهنجو ريڪارڊ چيڪ ڪري تصديق ڪئي ته داخلائن ۽ فائلن جي ڪا به صحيح داخلا موجود نه هئي. هڪ اعليٰ آفيسر چيو: “طريقه ڪار لڳ ڀڳ هڪ جهڙو آهي. جعلي فائلون ٺاهيون وڃن ٿيون، جن ۾ ڏيکاريو ويندو آهي ته زمين ليز تي يا ريگيولرائيز ٿي وئي آهي، گهڻو ڪري پراڻين حڪومتن جي نالي تي. پوءِ اهي فائلون ريونيو کاتي ۾ داخلا ڪرائڻ لاءِ استعمال ٿين ٿيون ۽ بعد ۾ انهن جي بنياد تي وڪري يا ترقياتي ڪم ٿئي ٿو.” سنڌ ۾ زمين جو انتظام هميشه تڪرارن ۽ ڪرپشن ۾ جڪڙيل رهيو آهي. ڪراچي ۾ ملير، ڪيماڙي ۽ ڪورنگي ۾ هزارين ايڪڙ زمينن تي حقيقي الاٽين، قبضا ڪندڙن ۽ هائوسنگ سوسائٽين جي وچ ۾ تڪرار جاري رهيو آهي. سرڪاري رپورٽن ۾ انڪشاف ٿيو آهي ته بااثر بلڊر، بدعنوان عملدارن سان گڏجي، جعلي نوٽيفڪيشنن ذريعي زمين ريگيولرائيز ڪرائيندا رهيا آهن. هن ڀيري لينڊ يوٽيلائيزيشن کاتي جي قدمن کي هڪ گڏيل مهم طور ڏٺو پيو وڃي، جنهن ۾ الاٽمينٽون رد ٿي رهيون آهن، رڪارڊ داخلا رد ٿي رهيون آهن ۽ ڪيسن کي قانوني ڪارروائي لاءِ موڪليو پيو وڃي. اينٽي ڪرپشن کاتي سفارش ڪئي آهي ته لاڳاپيل ضلعن جا ڊپٽي ڪمشنر منظم داخلا ۽ ميوٽيشن رد ڪن. ذميوارن خلاف قانوني ڪارروائي به متوقع آهي. اختيارين جو چوڻ آهي ته حڪومت زميني ريڪارڊ جي سخت نگراني ۽ الاٽمينٽ رجسٽريشن کي ڊجيٽل ڪرڻ تي غور ڪري رهي آهي، جيئن اهڙن فراڊن کي روڪي سگهجي. هي شروعات آهي، وڌيڪ الاٽمينٽون رد ٿي سگھن ٿيون: ذريعا ڪراچي: اينٽي ڪرپشن ذريعن جو چوڻ آهي ته: “هي رڳو مٿاڇرو رپورٽن جو حصو آهي. اهڙيون سوين فائلون جاچ هيٺ آهن ۽ وڌيڪ الاٽمينٽون رد ٿيڻ جو امڪان آهي.”