سنڌ جي جانورن ۾ لمپي بيماري پکڙيل، مقامي ويڪسين بدران ٻاهران مهانگي گهرائڻ جي سفارش

ڪراچي:(جمعو 29 آگسٽ 2025ع)سنڌ ۾ جانورن کي ٻن سالن کان لمپي ويڪسين نه ٿيڻ سبب لمپي اسڪن ڊزيز جي وبا ٻيهر پکڙجي وئي. ٺٽو، سجاول، بدين سميت ڪيترن ئي ضلعن جي ڪيس ظاهر ٿي پيا. سنڌ انسٽيٽيوٽ آف اينيمل هيلٿ پاران تيار ڪيل لمپي ويڪس جي ڪامياب تجربي باوجود لائيو اسٽاڪ کاتي پاران ويڪسين پرڏيهه مان گھرائڻ جون تياريون، لمپي ويڪس جا 10 لک ڊوز اسٽاڪ پيل آهن. ان حوالي سان مليل ڄاڻ موجب ته سنڌ ۾ لائيو اسٽاڪ کاتي جي اختيارين پاران ڪراچي کان سواءِ سنڌ جي ٻين سمورن ضلعن ۾ جانورن کي لمپي ويڪسين ٻن سالن کان نه لڳائڻ جي ڪري ٺٽو، سجاول ۽ بدين سميت ٻين ضلعن ۾ لمپي اسڪن ڊزيز جا ڪيس ظاهر ٿيا آهن. جنهن ڪري ڳائو مال سخت متاثر ٿيڻ جو خدشو ظاهر ڪيو ويو آهي. مليل ڄاڻ موجب لمپي اسڪن جي وبا پکڙجڻ باوجود لائيو اسٽاڪ کاتي جي اختيارين پاران سنڌ انسٽيوٽ آف اينيمل هيلٿ پاران مقامي سطح تي تيار ڪيل لمپي ويڪس خريد ڪري استعمال ڪرڻ بجاءِ پرڏيهه مان ويڪسين گھرائڻ جي تياري شروع ڪئي آهي. مليل ڄاڻ موجب ته سنڌ انسٽيٽيوٽ آف اينيمل هيلٿ پاران تيار ڪيل لمپي ويڪس جو ڊوز رڳو 25 کان 30 روپين ۾ تيار ڪري ڪامياب تجربو به ڪيو ويو هو، پر ان باوجود لائيو اسٽاڪ کاتي جي اختيارين پاران ڄاڻايل لمپي ويڪس خريدي استعمال ڪرڻ جي بجاءِ پرڏيهه مان 300 کان 350 روپين تائين ڊوز خريد ڪرڻ لاءِ تياريون ڪيون پيون وڃن. ذريعن موجب ته ڪجهه مهينا اڳ ڪراچي ڊويزن جي سمورن جانورن کي سنڌ انسٽيٽيوٽ جي لمپي ويڪس لڳائي وئي هئي، جنهن بعد ڪراچي ۾ لمپي جو ڪو به ڪيس ظاهر ناهي ٿيو. ان باوجود ٻين ضلعن لاءِ مهانگي ويڪسين گھرائي پئي وڃي. هن وقت سنڌ انسٽيٽيوٽ پاران تيار ڪيل لمپي ويڪسين جا 10 لک ڊوز پيل به آهن. ذريعن جو چوڻ آهي ته ڊي جي لائيو اسٽاڪ پاران صحت کاتي جي وزير ۽ سيڪريٽري کي سفارش ڪئي وئي آهي ته ترڪي مان ايمرجنسي بنيادن تي ويڪسين گھرائڻ جي اجازت ڏني وڃي. سنڌ ۾ ٻن سالن دوران پيدا ٿيل 40 لک گابن ۽ گابين کي ويڪسين نه ٿي ڪراچي: سنڌ ۾ 2 سالن دوران ڳائي مال ۾ 40 لک تائين اضافو، 2 سال اڳ هڪ ڪروڙ ڳائو مال موجود هو، ڳائو ماللمپي اسڪن ڊزيز سبب شديد متاثر ٿئي ٿو، جانورن کي هر سال لمپي کان بچاءُ واري ويڪسين لازمي لڳائڻي هجي ٿي پر ٻن سالن ڄاول 40 لک کان وڌيڪ ڳائي مال کي لمپي کان بچاءُ وارو هڪ ڊوز به نه لڳي سگھيو آهي. ان حوالي سان مليل ڄاڻ موجب ته 2 سال اڳ سنڌ ۾ لائيو اسٽاڪ کاتي جي اختيارين پاران جانورن کي لمپي کان بچاءُ وارا ويڪسين لڳايا ويا هئا. ان وقت سنڌ ۾ ڳائو مال هڪ ڪروڙ تائين موجود هو، پر ساليانو 20 سيڪڙو تائين ڳائي مال ۾ اضافي سبب هن وقت ڳائي مال ۾ 40 لکن جو اضافو ٿيو آهي. پر انهن کي هن وقت تائين لمپي کان بچاءُ واري ويڪسين نه لڳائي وئي آهي.