ڍاڪا:(ڇنڇر 23 آگسٽ 2025ع)بنگلاديش 1971 کان پوءِ پهريون ڀيرو پاڪستاني عملدارن لاءِ ويزا جون گهرجون ختم ڪري ڇڏيون آهن.
پرڏيهي ميڊيا موجب، بنگلاديش ۽ پاڪستان جي سفارتي ۽ سرڪاري پاسپورٽ رکندڙن کي هاڻي ٻنهي ملڪن جي وچ ۾ سفر ڪرڻ لاءِ ويزا جي ضرورت نه پوندي.
ميڊيا رپورٽن ۾ چيو ويو آهي ته نوبل انعام يافته ڊاڪٽر محمد يونس جي اڳواڻي ۾ بنگلاديش جي عبوري حڪومت باهمي ويزا جي ڇوٽ تي معاهدي جي منظوري ڏني آهي.
پريس سيڪريٽري شفيق الاسلام ڍاڪا ۾ هڪ نيوز ڪانفرنس کي ٻڌايو ته بنگلاديش جا 31 ٻين ملڪن سان اهڙا معاهدا آهن، جن جي تحت پاڪستاني عملدارن کي به ويزا کانسواءِ بنگلاديش ۾ داخل ٿيڻ جي اجازت هوندي ۽ اهو معاهدو 5 سالن تائين اثرائتو هوندو.
هي ترقي گذريل مهيني ڍاڪا ۾ بنگلاديشي گهرو صلاحڪار جهانگير عالم چوڌري ۽ پاڪستان جي گهرو وزير محسن نقوي جي وچ ۾ ملاقات کان پوءِ سامهون آئي.
هن ملاقات ۾، ٻنهي ڌرين سرڪاري پاسپورٽ رکندڙن لاءِ آمد تي ويزا جي معاهدي کي حتمي شڪل ڏيڻ جو اعلان ڪيو.
0 تبصرے
Do not use vulgar language