برساتن سبب حب ڊيم ڀرجي ويو، گوادر ڊيم ڊيڊ ليول تي پهچي ويا

حب:(ڇنڇر 23 آگسٽ 2025ع)بلوچستان جي ضلعي حب ۾ برساتن سبب، حب ڊيم پاڻي سان ڀرجي ويو، جنهن جي ڪري اسپل وي کولڻ لاءِ صرف 6 فوٽ پاڻي جي گنجائش بچي وئي. صوبائي آفتن جي انتظام واري اداري (PDMA) جي هڪ رپورٽ موجب، حب ڊيم جي پاڻي جي گنجائش 340 فوٽ آهي ۽ تازين برساتن کان پوءِ، حب ڊيم ۾ پاڻي جي سطح 334 فوٽ تائين پهچي وئي آهي. ڪيچ ضلعي ۾ ميراني ڊيم جي پاڻي جي گنجائش 246 فوٽ آهي، جتي هن وقت 226 فوٽ پاڻي موجود آهي، جڏهن ته زوب ضلعي ۾ سبزڪزئي ڊيم جي پاڻي ذخيرو ڪرڻ جي گنجائش 94 فوٽ آهي ۽ اتي 30 فوٽ پاڻي موجود آهي. رپورٽ ۾ اهو به چيو ويو آهي ته گوادر ۾ برسات نه پوڻ سبب، اتي جي ٽنهي ڊيمن ۾ پاڻي جي سطح ڊيڊ ليول جي ويجهو پهچي وئي آهي. رپورٽ موجب، گوادر جي شادي ڪور ڊيم جي پاڻي جي گنجائش 82 فوٽ آهي، پر اتي صرف 2 فوٽ پاڻي موجود آهي. اهڙي طرح سوار ڊيم ۾ ڏيڍ فوٽ ۽ اڪرا ڪور ڊيم ۾ صرف 2 فوٽ پاڻي آهي.