شيخ مجيب قتل ڪيس جو فيصلو ٻڌائيندڙ اڳوڻو چيف جسٽس گرفتار

ڏھاڪا:(خميس 24 جولاءِ 2025ع)شيخ مجيب قتل ڪيس ۾ فيصلو ڏيندڙ اڳوڻي چيف جسٽس کي گرفتار ڪيو ويو آهي. نيوز ايجنسي موجب، اڳوڻي چيف جسٽس اي بي ايم خيرالحق کي ڍاڪا جي ڌن منڊي علائقي ۾ سندس گهر مان گرفتار ڪيو ويو. اي بي ايم خيرالحق کي بغاوت ۽ ٺڳي سميت 3 ڪيسن ۾ گرفتار ڪيو ويو. هي آپريشن ڍاڪا ميٽروپوليٽن پوليس جي ڊيٽيڪٽو برانچ (ڊي بي) پاران ڪيو ويو، جنهن کان پوءِ کيس پڇا ڳاڇا لاءِ منٽو روڊ تي ڊي بي هيڊ ڪوارٽر منتقل ڪيو ويو. ڊيٽيڪٽو برانچ جي جوائنٽ ڪمشنر محمد ناصر الاسلام سندس گرفتاري جي تصديق ڪئي ۽ چيو ته سندس خلاف ڪيترائي ڪيس داخل ڪيا ويا آهن. اي بي ايم خيرالحق کي 2010 ۾ بنگلاديش جو 19 هون چيف جسٽس مقرر ڪيو ويو پر ايندڙ سال 67 سالن جي لازمي رٽائرمينٽ جي عمر تائين پهچڻ تي عهدي تان رٽائر ٿيو. پنهنجي عدالتي دور ۾، هن ڪيترائي اهم ۽ تاريخي فيصلا ڏنا، جن ۾ نگران حڪومتي نظام جي خاتمي، شيخ مجيب الرحمان جي قتل ڪيس، آئين ۾ پنجين ترميم، ۽ راڄڌاني ڍاڪا جي چوڌاري دريائن جي تحفظ سان لاڳاپيل ڪيس شامل آهن. رٽائرمينٽ کان پوءِ، هن کي 2013 ۾ لا ڪميشن جو چيئرمين بڻايو ويو ۽ ڪيترائي ڀيرا هن عهدي تي ٻيهر مقرر ڪيو ويو، جڏهن ته، جڏهن گذريل سال عوامي ليگ جي حڪومت گر ٿي، هن 13 آگسٽ تي پنهنجي عهدي تان استعيفيٰ ڏئي ڇڏي.