ڀارت: پهلگام واقعي متعلق سوال ڪرڻ تي ڪيترائي مسلمان گرفتار

آسام :(سومر 28 اپريل 2025ع)هندستاني سيڪيورٽي ايجنسين پهلگام واقعي تي تنقيد ڪرڻ تي زندگي جي مختلف شعبن سان تعلق رکندڙ ماڻهن کي گرفتار ڪرڻ شروع ڪري ڇڏيو آهي. هينئر تائين، 3 مختلف رياستن مان 25 ماڻهن کي گرفتار ڪيو ويو آهي، جن مان اڪثريت مسلمان آهي. پوليس ٽن هندستاني رياستن آسام، ميگھاليا ۽ تريپورا ۾ گهٽ ۾ گهٽ 25 ماڻهن کي گرفتار ڪيو آهي. گرفتار ٿيل ماڻهن ۾ هڪ ايم ايل اي، صحافي، شاگرد، وڪيل ۽ رٽائرڊ استاد شامل آهن. اهي گرفتاريون سوشل ميڊيا تي پهلگام واقعي بابت سوال اٿارڻ تي ڪيون ويون آهن. آسام ۾ 16 ماڻهن کي گرفتار ڪيو ويو آهي، جن ۾ آل انڊيا يونائيٽيڊ ڊيموڪريٽڪ فرنٽ جو ايم ايل اي امين الاسلام به شامل آهي، جيڪو پهريون گرفتار ٿيو هو، جنهن تي 2019 جي پلواما ۽ تازي پهلگام حملي کي "سرڪاري سازش" قرار ڏيڻ جو الزام هو، جنهن لاءِ کيس گرفتار ڪيو ويو ۽ سندس خلاف بغاوت جو ڪيس داخل ڪيو ويو. ٻين گرفتار ٿيل ماڻهن ۾ صحافي جابر حسين، آسام يونيورسٽي جو شاگرد اي ڪي بهاءُ الدين، وڪيل جاويد مظفر ۽ ڪيترائي سوشل ميڊيا استعمال ڪندڙ شامل آهن.