او جي ڊي سي ايل اٽڪ ۾ گئس جا نوان ذخيرا دريافت ڪري ورتا

اسلام آباد: (سومر 17 مارچ 2025ع)آئل اينڊ گئس ڊولپمينٽ ڪمپني لميٽيڊ (او جي ڊي سي ايل) اٽڪ ۾ گئس جا نوان ذخيرا دريافت ڪيا آهن. ترجمان موجب، او جي ڊي سي ايل پنجاب جي اٽڪ ضلعي جي صغري بلاڪ ۾ صغري نارٿ-1 کوهه مان گئس ۽ ڪنڊينسيٽ جي دريافت جو اعلان ڪيو آهي. او جي ڊي سي ايل هن بلاڪ جو واحد لائسنس يافته آهي ۽ 100 سيڪڙو ڪاروباري مفاد رکي ٿو. تفصيل موجب، کوهه جي کوٽائي 21 مئي 2024 تي شروع ٿي ۽ 4,942 ميٽر جي کوٽائي تي گئس دريافت ڪئي وئي. شروعاتي جاچ کان پوءِ، کوهه مان 13.95 ملين ڪيوبڪ فوٽ في ڏينهن (MMSCFD) گئس ۽ 430 بيرل في ڏينهن ڪنڊينسيٽ پيدا ٿيو. ترجمان موجب، هي دريافت پاڪستان جي مقامي توانائي وسيلن کي وڌائڻ ۽ درآمدات تي انحصار گهٽائڻ ۾ مدد ڪندي.