ریاض: (اربع 19 فيبروري 2025ع)سعودي عرب جي ڪابينا روس ۽ آمريڪا جي وچ ۾ ڳالهين جي آجيان ڪئي آهي.
ولي عهد محمد بن سلمان جي صدارت هيٺ ٿيل اجلاس ۾ چيو ويو ته آمريڪا-روس ڳالهين جو مقصد دنيا ۾ سيڪيورٽي ۽ امن کي وڌائڻ آهي.
ڪابينا جي ميمبرن چيو ته اهي وچ اوڀر سميت سڄي دنيا ۾ امن جي ڪوششن کي فروغ ڏيڻ ۾ پنهنجو ڪردار ادا ڪندا رهندا. ميمبرن اميد ظاهر ڪئي ته ڳالهين جي ڪاميابي دنيا ۾ امن ۽ سلامتي کي فروغ ڏيندي. آمريڪي پرڏيهي کاتي ڳالهين ۾ سعودي عرب جي ڪردار جي تعريف ڪئي.
يوڪرين ۾ جنگ بندي لاءِ سعودي عرب ۾ روس ۽ آمريڪا جي وچ ۾ ڳالهين جو پهريون دور مفيد قرار ڏنو ويو آهي. ڌرين ڳالهيون جاري رکڻ تي اتفاق ڪيو. آمريڪي پرڏيهي وزير مارڪو روبيو چيو ته هي ملاقات هڪ ڊگهي سفر تي پهريون قدم آهي. صدر ٽرمپ جلد تڪرار ختم ڪرڻ لاءِ پرعزم آهي.
آمريڪي پرڏيهي کاتي موجب، آمريڪا ۽ روس يوڪرين ڳالهين تي وڌيڪ اڳڀرائي تي ڪم ڪرڻ لاءِ هڪ گڏيل ڪميٽي ٺاهيندا. ماسڪو ۽ واشنگٽن پڻ لاڳاپن ۽ سفارتي عملي کي بحال ڪرڻ تي متفق ٿيا جيڪي جو بائيڊن جي دور ۾ خراب ٿي ويا هئا.
آمريڪي پرڏيهي وزير مارڪو روبيو چيو ته يوڪرين ۽ يورپ کي پاسيرو نه ڪيو پيو وڃي، انهن کي ڳالهين جي ايندڙ مرحلي ۾ شامل ڪيو ويندو، ۽ تڪرار جو خاتمو سڀني ڌرين لاءِ قابل قبول هجڻ گهرجي. روسي پرڏيهي وزير سرگئي لاوروف چيو ته يوڪرين تڪرار کي حل ڪرڻ ۽ سفارتي مشنن ۾ رڪاوٽون ختم ڪرڻ لاءِ به هڪ معاهدو ٿيو آهي.
ياد رهي ته گذريل ڏينهن رياض ۾ يوڪرين تڪرار تي آمريڪي ۽ روسي وفدن جي وچ ۾ ملاقات ٿي هئي. يوڪرين جي صدر وولوديمير زيلنسڪي سعودي عرب جو دورو ملتوي ڪري ڇڏيو آهي. صدر زيلنسڪي اڄ رياض جو دورو ڪرڻ وارو هو. پرڏيهي ميڊيا موجب يوڪريني صدر 10 مارچ تي سعودي عرب جو دورو ڪندو.
0 تبصرے
Do not use vulgar language