ڌوڪو۽ ٺڳي: شلپا ۽ راج ڪندرا جي هندستان ڇڏڻ تي پابندي

ممبئي:(ڇنڇر 06 سيپٽمبر 2025ع)بالي ووڊ اداڪارا شلپا شيٽي ۽ سندس مڙس راج ڪندرا کي 60 ڪروڙ رپين جي فراڊ ڪيس ۾ نوٽيس جاري ڪيو ويو آهي. شڪايت ڪندڙ ديپڪ ڪوٺاري الزام لڳايو ته جوڙي انهن سان 60 ڪروڙ رپين جي ڌوڪو ڪيو، جنهن کان پوءِ ممبئي پوليس لُڪ آئوٽ نوٽيس جاري ڪيو آهي. شڪايت ڪندڙ چيو ته هي فراڊ ڪيس شلپا شيٽي ۽ راج ڪندرا جي بند ڪمپني بيسٽ ڊيل ٽي وي پرائيويٽ لميٽيڊ سان لاڳاپيل آهي. جوابدار پهريان قرض گهريو ۽ پوءِ کيس سيڙپڪاري ڏيکاري مهينيوار منافعو ڏئي ٺڳيو. جوڙي 2015 کان 2023 تائين ڪاروباري سرمائي جي نالي تي پئسا ورتا، يعني 8 سال، پر ان کي ذاتي خرچن تي خرچ ڪيو. شڪايت ڪندڙ چيو ته شلپا شيٽي 2016 ۾ ڪمپني جي ڊائريڪٽر جي عهدي تان استعيفيٰ ڏني، جنهن کان پوءِ ڪمپني ديوالي ٿي وئي. ممبئي پوليس جي اقتصادي معاملن واري ونگ پاران داخل ڪيل ڪيس ۾، جاچ هيٺ جوڙي کي ملڪ ڇڏڻ کان روڪڻ لاءِ اميگريشن اختيارين کي لُڪ آئوٽ سرڪيولر جاري ڪيو ويو. راج ڪندرا ۽ شلپا شيٽي جي وڪيل الزام کي رد ڪندي چيو ته معاملي جو ڪو به ڏوهاري پهلو ناهي، اهو هڪ پراڻو معاملو آهي ۽ اهو هڪ خالص سول مسئلو آهي.