نوشھروفيروز:(جمعو 29 آگسٽ 2025ع)مورو واقعي ۽ بلاول زرداري قتل ڪيس سميت ڇھه ڪيسن جون ٻڌڻيون دھشتگردي جي انت واري خاص عدالت ۾ ٿيون. اين پي پي سربراھه غلام مرتضيٰ جتوئي ۽ مسرور جتوئي پاران پڪي ضمانت لاءِ ڏنل درخواست تي وڪيلن دليل ڏنا. جنھن بعد عدالت بلاول زرداري قتل ڪيس جي ٻڌڻي 17 سيپٽمبر تائين ۽ مورو واقعي وارن ڪيسن جون ٻڌڻيون 8 سيپٽمبر تائين ملتوي ڪري ڇڏيون. ٻئي پاسي اين پي پي سربراھ غلام مرتضيٰ جتوئي ميڊيا سان ڳالھائيندي چيو ته غيب جو علم صرف الله کي آھي. جڏھن ته 27 ھين ترميم کانپوءِ خبر پوندي ته ملڪ ۾ ڇا ٿو ٿئي، قياس آرايون آھن ته سسٽم ۾ بنيادي تبديليون ٿين پيون. ھن چيو ته پارليامينٽ ۾ ويٺلن جو علاج مفت نه ٿيڻ گھرجي. مان جڏھن پارليامياني ڪاميٽي جو ميمبر ھيس ان وقت چيو ويو ته ڪجھه غريب ايم پي ايز به آھن، ان ڪري علاج مفت ۽ پگھارون وڌايون وڃن، مون چيو ته واقعي غريب ايم پي ايز پيجروز ۾ ايندا آهن، ھن چيو ته جونيئر ذوالفقار ئي ڀٽو جو وارث آھي، جونيئر سان ٻه ڪلاڪ خلاصي ڪچھري ٿي، ڀٽو دور، بينظير دور ۽ موجوده پ پ جي دور تي ڳالھيون ٿيون ۽ جونيئر کي صلاح ڏني آھي ته پارٽي ڀلي الڳ ٺاھيو، پر پ پ مخالف اتحاد ۾ شامل رھو. ھوڏانھن اين پي پي سنڌ جي صدر مسرور جتوئي ميڊيا سان ڳالھائيندي چيو ته اسان تي داخل ٿيل ڪيس ڪوڙا آھن ۽ انشاءَ الله ڪوڙ ڪوڙ ٿيندو، سچ سچ ٿيندو. ھن چيو ته ڪھڙي دشمنيءَ تحت ڪيس پيا داخل ٿين ان دشمني جي مون کي خبر ناھي. ان ڳالهه جي مون کي خبر ناھي تہ اسان جي خلاف ڇو ڪارروائيون ڪيون پيون وڃن. ھن چيو ته جونيئر جي مھرباني آھي جو ھو اسان وٽ آيو ۽ کيس چيو ته الڳ الڳ پارٽين بجاءِ پ پ خلاف گڏيل اتحاد جي ضرورت آھي. ھن چيو ته عوام پوئين اليڪشن ۾ پ پ کي ووٽ ناھن ڏنا. اھي 47 فارم جي پيداوار آھن ۽ ڌانڌلي ڪري آيا آھن. پئسو انھن وٽ جام آھي. پئسي جي زور تي ھي ھلن پيا پر کين عوام جي حمايت حاصل ناھي. ھن چيو ته اليڪشن صاف ۽ شفاف ٿين ته سڄي پاڪستان کي خبر پئجي ويندي ته پ پ جو سنڌ ۾ ڇا آھي. ھن چيو ته پ پ جي بيڊ گورننس ۽ ڪرپشن سبب صوبن جي ڳالهه ھلي پئي. اھو سڄو ڏوھه پ پ جو آھي. ھن چيو ته ٻوڏ اچي پئي، سنڌ حڪومت کي کپي ته عوام کي درست انگ اکر ٻڌائين ۽ اھو ٻڌائين ته پوئتي پاڻي گھڻو آھي. صحيح انگ اکر اچڻ کپي ته عوام اھڙي نموني تياري ڪري سگھي.
0 تبصرے
Do not use vulgar language