لاھور:(جمعو 29 آگسٽ 2025ع)پنجاب ۾ دريائن ۾ ٻوڏ سان تباهي جو سلسلو جاري رهيو، ڪيترائي بند ٽٽڻ سان وڌيڪ ڪيئي ڳوٺ ٻڏي ويا، مختلف حادثن ۾ 25 ڄڻا فوت ٿي ويا، ڪيترائي لاپته رهيا، پاڪ فوج جو ٻيڙين ذريعي ريسڪيو آپريشن جاري آهي، ڀارت پاران پاڻي ڇڏڻ سبب راوي، چناب ۽ ستلج دريائن ۾ ٻوڏ جي صورتحال کانپوءِ لکين ماڻهو بيگهر ٿي ويا، دريائن جي ڪناري تي رهندڙن کي آباديون خالي ڪرڻ جو حڪم ڏنو ويو. چنيوٽ ۽ جهنگ لاءِ به خطرا وڌي ويا، سيالڪوٽ هوائي اڏو ٻڏي ويو، ائيرپورٽ عارضي طور تي بند ڪيو ويو، قومي ايئرلائن جي هوائي آپريشنز ۾ تبدلي ڪئي وئي، ڀارت پاران ڇڏيل پاڻي ۽ برساتن سبب ٻوڏ سان پنجاب ۾ وڏي پيماني تي تباهي ٿي آهي، ڪيترن ئي هنڌن وٽ بند ٽٽڻ سان پاڻي آبادين ۾ داخل ٿي ويو، پنجاب جي دريائن شهر، وسنديون ۽ ڳوٺ ٻوڙي ڇڏيا، گهر ۽ رستا تباهه، ٻوڏ جي وهڪرن جي گهيري هيٺ آيل علائقن مان ماڻهن جي لڏپلاڻ، قصور، وزيرآباد، نارروال، سيالڪوٽ، حافظ آباد، ڪماليا، منڊي بهاءُ الدين، بهاول نگر، وهاڙي ۽ پاڪ پتن سوڌو ڪيترن ئي علائقن ۾ درياءَ جي ڪنڌيءَ تي آباد ڳوٺ ٻڏي ويا، ريسڪيو ٽيمون، پاڪ فوج ۽ رينجرز جون امدادي ڪارروائيون جاري رهيون، پي ڊي ايم اي پنجاب موجب هينئر چناب وٽان 10 لک ڪيوسڪ ۽ راوي درياءَ وٽان 2 لک ڪيوسڪ پاڻي گذري رهيو آهي، فلڊ فورڪاسٽنگ ڊويزن ٻڌايو آهي ته راوي ۾ شاهدره وٽ انتهائي مٿانهين درجي جي ٻوڏ آهي، شاهدره وٽ راوي ۾ پاڻيءَ جي سطح لاڳيتو وڌي رهي آهي، ستلج درياءَ ۾ گنڊا سنگهه والا وٽ انتهائي مٿانهين درجي جي ٻوڏ ايندي، ٽريمون وٽ 29 آگسٽ تي انتهائي مٿانهين درجي ۽ پنجند وٽ 2 سيپٽمبر تي مٿانهين درجي جي ٻوڏ هوندي، سرگوڌا جي علائقي ڪوٽ مومن ۾ ٻوڏ جو پاڻي ڪيترن ئي علائقن ۾ داخل، بنڊي بهاءُ الدين جي تعلقي ڦاليا جا 69 ڳوٺ پاڻي جي گهيري هيٺ، پاڻ ۾ زميني رابطو ڪاٽا، گجرانوالا ۾ نالو اوور فلو ٿيڻ جي نتيجي ۾ ڪيترن ئي ڳوٺن جو زميني رابطو ڪاٽا، وزيرآباد ۾ درياءَ ڪناري ٺهيل ڪيترائي ڳوٺ ٻڏي ويا، درياءَ ڪناري آباد جلال پور پير والا جي 18 ڳوٺڻ ۾ ڪاهي پيو، چناب درياءَ جِي ٻوڏ جا وهڪرا ايندڙ 24ڪلاڪن ۾ جهنگ ۽ ايندڙ ٻن ڏينهن ۾ ملتان مان گذرندا، ستلج درياءَ ۾ ٻوڏ جا وهڪرا وڌڻ سان ڪَٽُ ۽ گهارا لڳڻ جا واقعا، بهاولپور ۾ ستلج تي ٺهيل اعظم والا، بستي يوسف والا ۽ احمد والا بند ٽٽي ويا، ڀرپاسي جي ڳوٺن ۾ پاڻي داخل ٿي ويو، بهاولنگر ۾ چناب درياءَ تي ڪيترائي زمينداري بند ختم ٿي ويا، درياهي بيلٽ سان ڳنڍيل علائقن ۾ پاڻي ، پاڪ پتن جي 15 ڳوٺن ۾ ستلج جو پاڻي داخل ٿي ويو، 20 هزار کان وڌيڪ ماڻهن جي درياهي علائقن مان لڏپلاڻ رهي.
0 تبصرے
Do not use vulgar language