لاھور:(ڇنڇر 12 جولاءِ 2025ع)خيبر پختونخواهه جي وڏي وزير علي امين گنڊاپور ۽ پاڪستان تحريڪ انصاف (پي ٽي آءِ) جي چيئرمين بئريسٽر گوهر جي اڳواڻي ۾ پارٽي اڳواڻن جو قافلو لاهور پهتو.
جڏهن علي امين گنڊاپور ۽ بئريسٽر گوهر جي اڳواڻي ۾ پي ٽي آءِ اڳواڻن جو قافلو اسلام آباد کان لاهور پهتو ته پوليس پي ٽي آءِ اڳواڻ ياسر گيلاني سميت چار ڪارڪنن کي حراست ۾ وٺي ڇڏيو، جيڪو شاهدره ۾ پارٽي قافلي جي استقبال لاءِ موجود هو. پوليس ڪجهه ڪلاڪن بعد ياسر گيلاني کي آزاد ڪري ڇڏيو.
پي ٽي آءِ اڳواڻن جو قافلو لاهور ۾ رائيونڊ روڊ تي هڪ خانگي فارم هائوس پهتو، جتي پارٽي چيئرمين بئريسٽر گوهر ۽ علي امين گنڊاپور جي اڳواڻي ۾ پي ٽي آءِ جي قومي ۽ صوبائي اسيمبلي ميمبرن جو اجلاس ٿيو، جنهن ۾ احتجاجي تحريڪ تي صلاح مشورا ڪيا ويا.
علي امين گنڊاپور الزام لڳايو ته پنجاب حڪومت اڳ ۾ ئي ڇاپن ۽ گرفتارين جو سلسلو شروع ڪري ڇڏيو آهي. هن چيو ته هي ڪا ورڪرز ميٽنگ ناهي، نه ئي ڪا ريلي آهي، هن وقت قيادت جي سطح تي صلاح مشورا ٿي رهيا آهن، لاهور ۾ به اسان پنجاب اسيمبلي مان معطل ڪيل ميمبرن سان يڪجهتي جو اظهار ڪنداسين، احتجاج جو پلان اڃا تائين ناهي ٺاهيو ويو.
پارٽي چيئرمين بئريسٽر گوهر چيو ته گرفتاريون ممڪن ناهن، اهو ٿيڻ وارو ناهي، ملڪ ۾ جمهوريت کي مضبوط ڪرڻ لاءِ سڀني کي گڏ ٿيڻو پوندو.
اپوزيشن ليڊر عمر ايوب چيو ته اسان پنهنجو آئيني ۽ جمهوري حق استعمال ڪري رهيا آهيون.
سلمان اڪرم راجا چيو ته باني پي ٽي آءِ جي پٽن جي واپسي انهن جو بنيادي حق آهي، اهي ايندا.
0 تبصرے
Do not use vulgar language