برطانوي پارليامينٽ ميمبرن پرڏيهي سيڪريٽري کي خط لکي حڪومت کان فلسطيني رياست کي تسليم ڪرڻ جو مطالبو

لنڊن:(ڇنڇر 12 جولاءِ 2025ع)درجنين برطانوي پارليامينٽ ميمبرن حڪومت کان مطالبو ڪيو آهي ته فوري طور تي فلسطيني رياست کي تسليم ڪيو وڃي. لڳ ڀڳ 60 برطانوي ليبر پارليامينٽ ميمبرن پرڏيهي سيڪريٽري ڊيوڊ ليمي کي خط لکيو آهي، جنهن ۾ اسرائيلي حڪومت جي فلسطينين کي زبردستي ڏکڻ رفح علائقي ۾ هڪ ڪئمپ ۾ منتقل ڪرڻ جي منصوبي تي سخت تنقيد ڪئي آهي. پارليامينٽ ميمبرن حڪومت کان مطالبو ڪيو ته فوري طور تي فلسطيني رياست کي تسليم ڪيو وڃي، ٻي صورت ۾ ٻه رياستي حل لاءِ ان جي حمايت بي اثر ٿي ويندي. انهن فلسطيني پناهگيرن لاءِ UNRWA جي مدد جاري رکڻ جو به مطالبو ڪيو ته جيئن انساني امداد ۽ ٻيون ضروري خدمتون فلسطينين تائين پهچي سگهن. اهو ياد رکڻ گهرجي ته غزه ۾ انساني امداد جي سخت کوٽ آهي، ۽ ان حوالي سان، فلسطيني اختيارين خبردار ڪيو آهي ته علائقي ۾ جاري محاصري ۽ انساني امداد جي سخت کوٽ جي ڪري لڳ ڀڳ 650,000 ٻار قحط ۽ غذائي کوٽ جي سنگين خطري ۾ آهن.