صنعا:(سومر 28 جولاءِ 2025ع)يمن جي حوثين اعلان ڪيو آهي ته اهي اسرائيل سان ڪاروبار ڪندڙ جهازن کي نشانو بڻائيندا.
يمني حوثين جي غلبي واري انصار الله پارٽي چيو آهي ته اسرائيلي بندرگاهن سان ڪاروبار ڪندڙ ڪنهن به ڪمپني جي جهازن کي نشانو بڻايو ويندو.
پرڏيهي ميڊيا موجب، يمن جي حوثي باغين اعلان ڪيو آهي ته اهي اسرائيلي بندرگاهن سان ڪاروبار ڪندڙ ڪمپنين جي ملڪيت وارن سڀني جهازن کي نشانو بڻائيندا، قطع نظر ان جي ته اهي ڪنهن به ملڪ سان تعلق رکن ٿا.
حوثي فوج جي ترجمان هڪ ٽي وي بيان ۾ خبردار ڪيو آهي ته جيڪڏهن ڪمپنيون انهن جي خبرداري کي نظرانداز ڪن ٿيون ته انهن جي جهازن کي نشانو بڻايو ويندو، قطع نظر انهن جي منزل جي.
هن وڌيڪ چيو ته يمني هٿياربند فوج سڀني ملڪن کي اپيل ڪري ٿي ته جيڪڏهن اهي هن ڇڪتاڻ کان بچڻ چاهين ٿا ته غزه تي جارحيت کي روڪڻ ۽ محاصرو ختم ڪرڻ لاءِ اسرائيل تي دٻاءُ وجهن.
اهو ياد رکڻ گهرجي ته آڪٽوبر 2023 ۾ اسرائيل ۽ غزه جي وچ ۾ جنگ جي شروعات کان وٺي، يمن جا حوثي باغي فلسطين جي حمايت ۾ يمني ساحل جي ويجهو اسرائيل ڏانهن ويندڙ جهازن کي نشانو بڻائي رهيا آهن.
مئي ۾، آمريڪا حوثين سان هڪ معاهدو ڪيو، جنهن ۾ آمريڪا انهن تي هوائي حملا بند ڪرڻ تي اتفاق ڪيو پر شرط رکي ته اهي جهازن تي حملو بند ڪن.
بهرحال، حوثين اهو واضح ڪيو ته معاهدو ان ڳالهه جي ضمانت نٿو ڏئي ته اسرائيل کي نشانو نه بڻايو ويندو.
0 تبصرے
Do not use vulgar language