صدر ٽرمپ جاپان ۽ ڏکڻ ڪوريا سميت ڪيترن ئي ملڪن تي ٽيرف لڳائڻ جو اعلان

واشنگٽن:(اڱارو 08 جولاءِ 2025ع)آمريڪي صدر ڊونلڊ ٽرمپ جاپان ۽ ڏکڻ ڪوريا سميت ڪيترن ئي ٻين ملڪن تي ٽيرف جو اعلان ڪيو آهي. نيوز ايجنسي جي مطابق، آمريڪي صدر ٽرمپ مختلف ملڪن تي لاڳو ٿيندڙ واپاري ٽيڪسن بابت سوشل ميڊيا تي خط پوسٽ ڪرڻ شروع ڪري ڇڏيا آهن. صدر ٽرمپ اعلان ڪيو ته پهرين آگسٽ کان جاپان ۽ ڏکڻ ڪوريا کان ايندڙ شين تي 25 سيڪڙو ٽيڪس لاڳو ڪيو ويندو. ان کان علاوه، آمريڪي صدر تيونس تي 25 سيڪڙو، انڊونيشيا تي 32 سيڪڙو، بوسنيا تي 30 سيڪڙو ۽ بنگلاديش تي 35 سيڪڙو ٽيرف جو اعلان ڪيو. ٽرمپ چيو ته سربيا تي 35 سيڪڙو ۽ ڪمبوڊيا تي 36 سيڪڙو ٽيرف لاڳو ڪيو ويو آهي، جڏهن ته ٿائيلينڊ تي 36 سيڪڙو ٽيرف لاڳو ڪيو ويندو. آمريڪي صدر چيو ته ملائيشيا ۽ قازقستان تي 25 سيڪڙو ٽيرف، ڏکڻ آفريڪا تي 30 سيڪڙو، لاوس تي 40 سيڪڙو ٽيرف ۽ ميانمار تي 40 سيڪڙو ٽيرف لاڳو ڪيو ويندو. ان کان اڳ سومر تي، آمريڪا اعلان ڪيو ته هو مختلف ملڪن تي ٽيرف وڌائڻ جي آخري تاريخ 9 جولاءِ کان 1 آگسٽ تائين وڌائيندو.