اسلام آباد:(جمعو 18 جولاءِ 2025ع)ملڪ ۾ گذريل 24 ڪلاڪن ۾ تيز مون سون جي برساتن ۽ ٻوڏ سبب 55 ماڻهو فوت ٿي ويا آهن.
اين ڊي ايم اي موجب، گذريل 24 ڪلاڪن ۾ مون سون جي برساتن سبب 227 ماڻهو زخمي پڻ ٿيا آهن.
اين ڊي ايم اي جو چوڻ آهي ته 26 جون کان وٺي ملڪ ۾ 178 ماڻهو فوت ٿي چڪا آهن، جن ۾ 85 ٻار به شامل آهن، جڏهن ته هن دوران 491 ماڻهو زخمي ٿيا آهن.
نيوز ايجنسي موجب، سڀ کان وڌيڪ موت گهر ٽٽڻ، ٻوڏ ۽ بجلي جو ڪرنٽ لڳڻ سبب ٿيا.
ٻئي طرف، راولپنڊي ۽ اسلام آباد ۾ گذريل رات کان ٿيندڙ طوفاني برساتن تمام گهڻو نقصان پهچايو آهي. نالا لئي ۾ پاڻي جي سطح بلند هجڻ ڪري، خطري جا الارم وڄايا ويا آهن ۽ ويجهي آبادي کي محفوظ هنڌ ڏانهن منتقل ٿيڻ جون هدايتون جاري ڪيون ويون آهن.
گذريل رات کان وٺي جڙيل شهرن ۾ 250 ملي ميٽر کان وڌيڪ مينهن رڪارڊ ڪيو ويو آهي، جنهن جي ڪري راولپنڊي ۽ اسلام آباد جا هيٺانهين علائقا پاڻي هيٺ اچي ويا آهن. راولپنڊي جي ڍوڪ خابا علائقي ۾ پاڻي جمع ٿيڻ سبب شهري مشڪلاتن کي منهن ڏئي رهيا آهن.
پنجاب ۾، ڊيمن، دريائن، تلاءَ ۽ ڍنڍن ۾ ترڻ تي قلم 144 تحت پابندي لڳائي وئي آهي، جڏهن ته گهٽين، روڊن، کليل جڳهن يا عوامي هنڌن تي گڏ ٿيل برساتي پاڻي ۾ وهنجڻ تي به پابندي لڳائي وئي آهي.
نوٽيفڪيشن موجب، ڊيمن، دريائن، واهن، تلاءَ ۽ ڍنڍن ۾ غير مجاز ٻيڙي هلائڻ تي به پابندي لڳائي وئي آهي.
پنجاب جي گهرو کاتي موجب، پابنديون 30 آگسٽ تائين لاڳو رهنديون.
0 تبصرے
Do not use vulgar language