راولپنڊي:(آچر 27 جولاءِ 2025ع)پنجاب ۾ جرڳي جي حڪم تي 19 سالن جي ڇوڪري جي غيرت جي نالي تي قتل جي حوالي سان پوليس ثبوت گڏ ڪري ورتا آهن ۽ 9 شڪي ماڻهن کي گرفتار ڪيو ويو آهي.
تفصيل موجب راولپنڊي پوليس جو چوڻ آهي ته هڪ اعليٰ سطحي جاچ ٽيم 19 سالن جي ڇوڪري سدره جي ڪيس ۾ سڀ ثبوت گڏ ڪري ورتا آهن، جنهن کي غيرت جي نالي تي قتل ڪيو ويو هو. جرڳي ۽ قتل ۾ ملوث سهولتڪارن اعترافي بيان به ڏنا آهن ۽ علائقي جي مئجسٽريٽ جي حڪم تي سڀاڻي قبر کوٽي ويندي، جنهن لاءِ قبرستان ۾ پوليس اهلڪار مقرر ڪيا ويا آهن.
پوليس اختيارين جو چوڻ آهي ته مقتول ڇوڪري جي مڙس ضياءُ الرحمان ۽ سندس سسر جاچ ۾ اهم انڪشاف ڪيا آهن ۽ شڪي ماڻهن جي موبائل فونن مان اهم ڊيٽا ۽ ثبوت پڻ حاصل ڪيا ويا آهن.
راولپنڊي ۾ شادي شده عورت جو قتل، جرگه اڳواڻ عصمت الله گرفتار
پوليس موجب ڪيس ۾ قتل جون دفعات به شامل ڪيون ويون آهن، پوليس ۽ رياست به هن ڪيس ۾ مدعي بڻجي ويا آهن، جڏهن ته ڪيس ۾ دهشتگردي جون دفعات شامل ڪرڻ لاءِ قانوني راءِ طلب ڪئي وئي آهي. پوليس اختيارين جو چوڻ آهي ته راولپنڊي شهر ۾ جرگه منعقد ڪري قتل جو حڪم ڏيڻ دهشتگردي جي زمري ۾ اچي ٿو. ٻڌايو ويو آهي ته گرفتار جوابدار جو وڌيڪ جسماني ريمانڊ ورتو ويندو.
ان دوران، هڪ ٻئي ڪيس ۾، شڪريال ۾ سدره نالي هڪ ٻي عورت جي قتل جو ڪيس ڪالهه صادق آباد ٿاڻي ۾ سندس مڙس جي شڪايت تي داخل ڪيو ويو آهي، جنهن مطابق مقتول سدره 3 ٻارن جي ماءُ هئي. مڙس چيو ته هڪ مائٽ کيس فون تي اطلاع ڏنو ته سندس زال کي قتل ڪيو ويو آهي. واقعي کان اڳ، سدره ٻارن کي هڪ مائٽ جي گهر ڇڏي وئي هئي. جڏهن هو گهر پهتو ته مکيه دروازو اندر کان بند هو، زال اندر رت ۾ لت پت پيل هئي، هڪ نامعلوم شخص گهر ۾ داخل ٿي منهنجي زال کي قتل ڪري ڇڏيو هو.
0 تبصرے
Do not use vulgar language