غزہ:(جمعو 27 جون 2025ع)غزه ۾ جاري اسرائيلي جارحيت ۾ گهٽتائي نه آئي آهي، صهيونستي فوج اڄ وڌيڪ 26 فلسطيني شهيد ڪيا آهن، جڏهن ته گذريل 24 ڪلاڪن ۾ 72 فلسطيني اسرائيلي جارحيت جو شڪار ٿيا آهن.
اسرائيلي فوج رفح جي اتر ۾ هڪ امدادي مرڪز جي ويجهو 6 ماڻهن کي نشانو بڻايو، جڏهن ته غزه شهر جي تفاح پاڙي ۾ 8 ماڻهو شهيد ٿيا ۽ المواسي جي ڏکڻ علائقي ۾ هڪ عارضي پناهگير ڪئمپ تي حملي ۾ 2 ماڻهو شهيد ٿيا.
عرب ميڊيا فلسطيني اختيارين جو حوالو ڏيندي چيو ته گذريل 4 هفتن دوران امداد حاصل ڪرڻ جي ڪوشش دوران اسرائيلي فوج طرفان 549 فلسطيني شهيد ۽ 4,000 کان وڌيڪ زخمي ٿيا آهن.
اسرائيلي فوج اتر غزه جي جبليه علائقي ۾ حملا ڪيا، جڏهن ته خان يونس جي ڏکڻ علائقي ۾ ڌماڪن سان ڪيتريون ئي رهائشي عمارتون پڻ ڊهي پيون.
ان دوران، غزه ۾ طبي خدمتن جي ڊائريڪٽر خبردار ڪيو آهي ته غزه ۾ 17,000 کان وڌيڪ ٻار غذائي کوٽ جو شڪار آهن، هن چيو ته جيڪڏهن فوري ۽ اثرائتا قدم نه کنيا ويا ته وڏي تعداد ۾ ٻار فوت ٿي سگهن ٿا.
هن عالمي برادري کان مطالبو ڪيو ته ٻارڙن لاءِ کير ۽ دوائن جي فراهمي کي يقيني بڻايو وڃي ۽ اهو پڻ چيو ته عملي، طبي سامان ۽ دوائن جي کوٽ سبب ڪيتريون ئي سرجريون ملتوي ڪيون ويون آهن.
ٻئي طرف، فلسطيني مزاحمتي تنظيم القدس برگيڊ دعويٰ ڪئي آهي ته هن، القسام برگيڊ سان گڏجي، خان يونس جي اتر ۾ اسرائيلي فوجين ۽ بکتر بند گاڏين تي مارٽر گولا فائر ڪيا.
0 تبصرے
Do not use vulgar language