پاڪستان جي 44.7 سيڪڙو آبادي غربت جي لڪير کان هيٺ زندگي گذاري پئي:ورلڊ بينڪ

واشنگٽن:(جمعو 06 جون 2025ع)ورلڊ بينڪ جي مطابق، پاڪستان ۾ آبادي جو 44.7 سيڪڙو غربت جي لڪير کان هيٺ لهي چڪو آهي، جيڪو اڳ ۾ 39.8 سيڪڙو هو. ورلڊ بينڪ پاران جاري ڪيل رپورٽ ۾ چيو ويو آهي ته دنيا جي گهٽ وچولي آمدني وارن ملڪن لاءِ، في ڪس 4.20 ڊالر في ڏينهن ڪمائيندڙن کي غربت جي لڪير کان هيٺ سمجهيو ويندو آهي. اڳ ۾، في ڪس 3.65 ڊالر في ڏينهن ڪمائيندڙن کي غربت جي لڪير کان هيٺ سمجهيو ويندو هو، جيڪو هاڻي وڌايو ويو آهي. نتيجي طور، پاڪستان ۾ غربت جي سطح وڌي 44.7 سيڪڙو ٿي وئي آهي. ورلڊ بينڪ جي رپورٽ موجب، ملڪ ۾ غريب ترين آبادي 16.5 سيڪڙو آهي، جن جي روزاني آمدني في ڪس 3 ڊالر آهي، جڏهن ته مٿين وچولي آمدني 8.5 ڊالر في ڏينهن آهي، ۽ اهو پاڪستان جي ڪل آبادي جو 88.4 سيڪڙو آهي. ورلڊ بينڪ جي غربت جا اهي انگ اکر 2017 جي آبادي جي حساب سان مرتب ڪيا ويا آهن، جڏهن ته 2023 ۾ پاڪستان ۾ هڪ نئين مردم شماري ڪرائي وئي هئي. 2017 جي مردم شماري جي مطابق، پاڪستان جي ڪل آبادي 206 ملين هئي، ۽ غربت ۾ رهندڙ ماڻهن جو تعداد 85 ملين وڌي 91 ملين ٿي ويو.