تل ابیب:(سومر 05 مئي 2025ع)يمن کان تل ابيب جي بن گوريون ايئرپورٽ تي حوثي باغين جي حملي کان پوءِ اسرائيلي وزيراعظم نيتن ياهو ايران تي حملي جي ڌمڪي ڏني آهي.
برطانوي اخبار دي گارڊين جي مطابق، اسرائيلي وزيراعظم نيتن ياهو يمن کان تل ابيب جي بن گوريون ايئرپورٽ تي حملي کان پوءِ ايران کي کليل ڌمڪي ڏني آهي، ۽ چيو آهي ته اسرائيل يمن جي حوثي باغين ۽ "انهن دهشتگردن جي ايراني آقائن" کان بدلو وٺندو.
رپورٽ موجب، اسرائيلي وزيراعظم سوشل ميڊيا ايپ ايڪس تي ڌمڪي ڏني آهي ته اسرائيل حوثي حملي جو جواب "پنهنجي مرضي جي وقت ۽ جڳهه تي" ڏيندو. ٽيليگرام تي، نتنياهو چيو ته اسرائيل ماضي ۾ حوثين خلاف ڪارروائي ڪئي آهي ۽ مستقبل ۾ ٻيهر ڪارروائي ڪندو.
ياد رهي ته يمني حوثين پاران فائر ڪيل بيلسٽڪ ميزائل اسرائيل جي مکيه بن گوريون انٽرنيشنل ايئرپورٽ جي احاطي ۾ ڪري پيو.
ميزائل لڳڻ سان اٺ ماڻهو زخمي ٿيا، هوائي اڏي تي هڪ روڊ ۽ هڪ گاڏي کي نقصان پهتو، ۽ هوائي ٽرئفڪ کي عارضي طور تي معطل ڪيو ويو.
حوثي باغين حملي جي ذميواري قبول ڪئي آهي، جڏهن ته اسرائيلي فوج تصديق ڪئي آهي ته ميزائل يمن مان فائر ڪيو ويو هو ۽ تسليم ڪيو ته اسرائيلي ۽ آمريڪي دفاعي نظام ميزائل کي ڪيرائڻ ۾ ناڪام ٿيا، جنهن جي جاچ جاري آهي.
ٻئي طرف، ميزائل حملي کان پوءِ، آمريڪا ۽ ڪيترن ئي يورپي ملڪن جي ايئر لائنز تل ابيب لاءِ پنهنجون اڏامون معطل ڪري ڇڏيون آهن.
0 تبصرے
Do not use vulgar language