ٽرمپ هارورڊ يونيورسٽي کي پرڏيهي شاگردن جي داخلا کان روڪي ڇڏيو

واشنگٽن:(جمعو 23 مئي 2025ع)آمريڪي صدر ڊونلڊ ٽرمپ هارورڊ يونيورسٽي تي پرڏيهي شاگردن جي داخلا تي پابندي لڳائي ڇڏي آهي. پرڏيهي خبرون ڏيندڙ اداري موجب ڊونلڊ ٽرمپ جي انتظاميا خميس ڏينهن هارورڊ يونيورسٽي جي پرڏيهي شاگردن کي داخلا ڏيڻ جي اختيار کي رد ڪري ڇڏيو. آمريڪي اخبار جو چوڻ آهي ته هوم لينڊ سيڪيورٽي سيڪريٽري ڪرسٽين نوم هڪ خط ۾ يونيورسٽي کي ٽرمپ انتظاميا جي قدم کان آگاهه ڪيو ۽ چيو ته هي قدم هوم لينڊ سيڪيورٽي جي يونيورسٽي ۾ جاري جاچ جي جواب ۾ کنيو پيو وڃي. آمريڪي هوم لينڊ سيڪيورٽي کاتي جو چوڻ آهي ته هارورڊ يونيورسٽي جي شاگرد ۽ مهمان ايڪسچينج پروگرام جي سرٽيفڪيشن جي مدت ختم ٿي وئي آهي. آمريڪي هوم لينڊ سيڪيورٽي کاتي موجب، هارورڊ يونيورسٽي پرڏيهي شاگردن کي داخلا نٿي ڏئي سگهي ۽ موجوده پرڏيهي شاگردن کي منتقلي ڪرڻي پوندي. ٻئي طرف، هارورڊ يونيورسٽي سخت رد عمل ظاهر ڪندي هن قدم کي "غير قانوني" قرار ڏنو ۽ چيو ته اهو اداري ۽ سڄي ملڪ کي "سنگين نقصان" پهچائيندو. ان کان اڳ، آمريڪي صدر ڊونلڊ ٽرمپ جي انتظاميا هارورڊ يونيورسٽي کي اربين ڊالر جي امداد روڪي ڇڏي هئي. اهو ياد رکڻ گهرجي ته ٽرمپ انتظاميه مارچ ۾ چيو هو ته هو هارورڊ جي تقريبن 256 ملين ڊالر جي وفاقي معاهدن ۽ 8.7 بلين ڊالر جي گرانٽ واعدن جو جائزو وٺي رهي آهي ڇاڪاڻ ته يونيورسٽي ڪيمپس ۾ سامي مخالف رويي کي روڪڻ لاءِ ڪافي قدم نه کنيا هئا. ٽرمپ انتظاميا ۽ هارورڊ جي وچ ۾ ڇڪتاڻ تڏهن وڌي وئي جڏهن يونيورسٽي، ٻين يونيورسٽين جي برعڪس، دٻاءُ جي باوجود، پنهنجي تعليمي ۽ انتظامي معاملن ۾ سرڪاري مداخلت قبول ڪرڻ کان انڪار ڪيو.