اسلام آباد:(آچر 25 مئي 2025ع)وفاقي راڄڌاني ۾ غير قانوني تعميرات ۽ هائوسنگ سوسائٽين خلاف فوري ڪريڪ ڊائون جو فيصلو ڪيو ويو آهي.
گهرو وزير محسن نقوي جي صدارت هيٺ ٿيل اجلاس ۾ غير قانوني اڏاوتن خلاف فوري آپريشن شروع ڪرڻ جو فيصلو ڪيو ويو.
اجلاس ۾ غير منظور ٿيل هائوسنگ سوسائٽين خلاف ڪارروائي ڪرڻ جو فيصلو ڪيو ويو، ان کان علاوه غير منظور ٿيل گهرن خلاف ڪارروائي ڪئي ويندي.
ان موقعي تي گهرو وزير محسن نقوي چيو ته لاڳاپيل آفيسر ان حوالي سان زيرو ٽالرنس پاليسي تي عملدرآمد کي يقيني بڻائين ۽ سيٽلائيٽ ميپنگ ڪري هر قسم جي غير قانوني تعميرات کي روڪيو وڃي. اسلام آباد ۾ شهرين کي عالمي معيار جون خدمتون فراهم ڪرڻ هڪ ترجيح هجڻ گهرجي.
گهرو وزير محسن نقوي لاڳاپيل ايس پيز ۽ اسسٽنٽ ڪمشنرن کي هدايت ڪندي چيو ته پوليس ۽ انتظاميا جي تصوير کي بهتر بڻائڻو پوندو، جيڪو تڏهن ئي ممڪن آهي جڏهن شهري انهن تي اعتماد ڪن.
محسن نقوي چيو ته لاڳاپيل آفيسرن کي شهرين جي سهولت لاءِ نوان قدم کڻڻ گهرجن ۽ گهربل نتيجا حاصل ڪرڻ لاءِ هن عمل کي پوري عزم ۽ قومي جذبي سان اڳتي وڌائڻ گهرجي.
گهرو وزير اسلام آباد ۾ ضروري شين جي قيمتن تي اثرائتي ڪنٽرول کي يقيني بڻائڻ جي هدايت ڪئي ۽ چيو ته عيدالاضحيٰ جي ڏينهن ۾ شهر کي صاف سٿرو رکڻ جو خاص خيال رکيو وڃي.
0 تبصرے
Do not use vulgar language