ٽرمپ پاران جديد ترين 'گولڊن ڊوم' دفاعي نظام جي منصوبي جو اعلان

واشنگٽن:(اربع 21 مئي 2025ع)آمريڪي صدر ڊونلڊ ٽرمپ آمريڪا لاءِ هڪ نئين ميزائل دفاعي نظام جي منصوبن جو اعلان ڪيو آهي، جنهن کي 'گولڊن ڊوم' سڏيو ويندو آهي. پرڏيهي خبرون ڏيندڙ اداري موجب آمريڪي صدر ڊونلڊ ٽرمپ آمريڪا کي پرڏيهي حملي کان بچائڻ لاءِ هڪ نئين ميزائل ڊفينس سسٽم "گولڊن ڊوم" جي منصوبي جو اعلان ڪيو آهي ۽ چيو آهي ته اهو نظام سندس ٻئي دور جي آخر تائين فعال ٿي ويندو. وائيٽ هائوس ۾ ڳالهائيندي ٽرمپ چيو ته، "چونڊ مهم دوران، مون آمريڪي عوام سان واعدو ڪيو هو ته مان هڪ جديد ترين ميزائل دفاعي شيلڊ ٺاهيندس." هن چيو ته، "اڄ مون کي اهو اعلان ڪندي خوشي ٿي رهي آهي ته اسان سرڪاري طور تي هن جديد نظام لاءِ بنيادي ڊيزائن چونڊيو آهي. گولڊن ڊوم دفاعي نظام تي 175 ارب ڊالر خرچ ٿيندا." ٽرمپ چيو ته دفاعي بل ۾ گولڊن ڊوم لاءِ 25 ارب ڊالر شامل هوندا، گولڊن ڊوم لاءِ هر شيءِ آمريڪا ۾ ٺاهي ويندي، ۽ خلائي آپريشنز جو ڊپٽي چيف، جنرل مائيڪل، منصوبي جي اڳواڻي ڪندو. آمريڪي صدر چيو ته گولڊن ڊوم دفاعي نظام جا ڪجهه حصا زمين جي مدار ۾ به هوندا، ۽ هن نظام ۾ سيٽلائيٽ ٽريڪنگ ۽ خلائي مداخلت ڪندڙ پڻ شامل هوندا. گولڊن ڊوم دفاعي نظام خلا مان لانچ ڪيل ميزائلن کي تباهه ڪرڻ جي قابل پڻ هوندو. ان کان علاوه، ٽرمپ چيو ته ڪينيڊا گولڊن ڊوم ميزائل دفاعي نظام جو حصو بڻجڻ چاهي ٿو ۽ آمريڪا پڻ ان سلسلي ۾ ڪينيڊا جي مدد ڪندو. ٻئي طرف، آمريڪي دفاع واري کاتي جي سربراهه، پينٽاگون، چيو ته گولڊن ڊوم جو مقصد وطن کي ڪروز، بيلسٽڪ ۽ هائپرسونڪ ميزائلن کان بچائڻ آهي، چاهي اهي روايتي هجن يا ايٽمي.