نوشھره: (ڇنڇر 01 مارچ 2025ع)دارالعلوم حقانيه اڪوڙا خٽڪ ۾ ڪالهه ٿيل خودڪش حملي جي جاچ جاري آهي.
ذريعن موجب، خودڪش بمبار جي عضون جا نمونا سڃاڻپ لاءِ نادرا ڏانهن موڪليا ويا آهن.
ذريعن جو چوڻ آهي ته جاچ ٽيمن مختلف هنڌن تان سي سي ٽي وي فوٽيج حاصل ڪيا آهن.
ذريعن جو چوڻ آهي ته جڏهن مولانا حامد الحق مسجد مان گهر لاءِ نڪتو ته حملي آور کيس ڏاڪڻين جي ويجهو مليو. جاچ ٽيمون جاچ ڪري رهيون آهن ته خودڪش بمبار ڏاڪڻين تائين ڪيئن پهتو.
ان حوالي سان ميڊيا سان ڳالهائيندي آءِ جي ڪي پي ذوالفقار حميد چيو ته دارالعلوم حقانيه ۾ خودڪش حملي جي جاچ ٽن رخن کان جاري آهي ۽ سي ٽي ڊي سميت مختلف ادارا تيزي سان جاچ ڪري رهيا آهن.
آءِ جي ڪي پي ذوالفقار حميد چيو ته خيبر پختونخواهه ۾ سيڪيورٽي هاءِ الرٽ ڪئي وئي آهي، ۽ حملي ۾ ملوث دهشتگردن کي هر قيمت تي گرفتار ڪري سزا ڏني ويندي.
ياد رهي ته گذريل ڏينهن نوشهره ۾ دارالعلوم حقانيه اڪوڙا خٽڪ ۾ جمعي جي نماز کان پوءِ ٿيل خودڪش ڌماڪي ۾ جي يو آءِ (س) جي سربراهه ۽ مدرسي جي ڊپٽي سپرنٽينڊنٽ مولانا حامد الحق سميت 8 ڄڻا شهيد ٿي ويا هئا.
واقعي جو ڪيس مولانا حامد الحق حقاني جي پٽ عبدالحق ثاني جي مدعيت ۾ سي ٽي ڊي مردان ۾ نامعلوم جوابدارن خلاف داخل ڪيو ويو آهي، جنهن ۾ دهشتگردي ۽ قتل سميت ٻيون دفعات شامل ڪيون ويون آهن.
سي ٽي ڊي عوام کي خودڪش بمبار جي سڃاڻپ ۾ مدد جي اپيل ڪئي آهي ۽ معلومات لاءِ 500,000 رپين جي انعام جو اعلان پڻ ڪيو آهي.
0 تبصرے
Do not use vulgar language