کيرٿر ڪينال ذريعي بلوچستان کي پاڻي جي فراهمي ڪوٽا موجب بحال نه ٿي سگهي

سکر:(ڇنڇر 03 آگسٽ 2024ع)سکر بئراج مان کيرٿر ڪينال ذريعي بلوچستان کي پاڻي جي فراهمي ڪوٽا موجب بحال نه ٿي سگهي آهي. ميڊيا سان ڳالهائيندي بلوچستان مان ارسا ميمبر عبدالحميد چيو ته سکر بئراج جا 2 دروازا ڏيڍ مهينو اڳ پاڻي جي پريشر سبب متاثر ٿيا هئا، جنهن سبب کيرٿر ڪينال ذريعي بلوچستان کي پاڻي جي فراهمي گهٽ ٿي وئي آهي. هن چيو ته کيرٿر مان 2400 ڪيوسڪ پاڻي ملڻ بدران صوبي کي رڳو 1200 ڪيوسڪ پاڻي ملي رهيو آهي، جيڪو ڪينال ۾ دم تائين نه پهتو آهي، جڏهن ته پٽي فيڊر ڪئنال کي لڳ ڀڳ پورو پاڻي ملي رهيو آهي، پر 30 ڪلوميٽر ايراضيءَ جو پاڻي کوٽ آهي. هي ڪئنال مٽيءَ سان ڀريل آهي، جتان زميندار گهٽ پاڻي کڻي رهيا آهن. ميمبر ارسا وڌيڪ چيو ته آبپاشي کاتي جي سروي موجب بلوچستان جي زميندارن کي کيرٿر ڪئنال مان پاڻي جي مڪمل فراهمي نه ٿيڻ سبب 8 ارب رپين جو نقصان برداشت ڪرڻو پيو. ٻئي طرف صوبي جي زميندارن جو چوڻ آهي ته نصيرآباد ۽ جعفرآباد ۾ واهن مان پاڻي نه ملڻ سبب صوبي جي گرين بيلٽ ۾ زراعت تباهه ٿي وئي آهي.