پي ٽي آءِ پاران اسرائيل سان لاڳاپن جي ڳالهه ملڪ ۾ حڪومت تبديل ڪرڻ جي سازش جو حصو قرار

اسلام آباد : آچر 19 جون 2022ع : پي ٽي آءِ چيئرمين عمران خان چيو آهي ته حڪمران اتحاد جي اڳواڻ پاران اسرائيل سان لاڳاپن جي ڳالهه ملڪ ۾ حڪومت تبديل ڪرڻ جي سازش جو حصو آهي. ملڪ جي مختلف شهرن ۾ مهانگائي خلاف پي ٽي آءِ پاران منعقد ڪيل عوامي ميڙاڪن کي وڊيو لنڪ خطاب ۾ عمران خان چيو ته پاڪستان ۾ جنهن مقصد لاءِ راڄ قائم ڪيو ويو، اهو ئي ڪريون جيڪو آمريڪا، ڀارت ۽ اسرائيل چاهين. عمران خان چيو ته هي ايجنڊا اسان جي آزادي ۽ خودمختياري جي خلاف آهي، ان ايجنڊا تي عمل ڪرڻ ڪنهن جي نظريي کي دفن ڪرڻ جي برابر آهي. اڳوڻي وزيراعظم چيو ته سليم مانڊوي والا اسرائيل سان لاڳاپا وڌائڻ جي ڳالهه ڪري رهيو آهي، اهي سڀ هڪ ايجنڊا تحت ڪم ڪري رهيا آهن. پي ٽي آءِ چيئرمين چيو ته بلاول ڀٽو چيو ته ڀارت سان سٺا لاڳاپا هئڻ گهرجن، اسان به ڀارت سان سٺا لاڳاپا رکڻ جي ڪوشش ڪئي پر جڏهن ڀارت ڪشمير جي خاص حيثيت ختم ڪئي ته اسان لاڳاپا ٽوڙي ڇڏيا. هاڻي جيڪڏهن اسان ڀارت سان لاڳاپا ٺاهينداسين ته اهو ڪشميرين سان خيانت هوندو. عمران خان جو چوڻ آهي ته شهباز شريف ۽ مفتاح اسماعيل کي ڄاڻڻ گهرجي ته آمريڪا ڪڏهن به مفت ۾ ڪا رعايت نه ڪندو آهي. عمران خان چيو ته اسان قوم جو خيال رکيو پر اسان کان پوءِ پيٽرول ۽ بجلي جي اگهن ۾ واڌ ڪئي وئي. اڳوڻي وزيراعظم چيو ته ڊيزل جي مهانگي سبب هارين کي تڪليف ٿي رهي آهي، جيڪڏهن هاري متاثر ٿيا ته فوڊ سيڪيورٽي جو مسئلو ٿيندو. چيو ويو ته پيٽرول جا اگهه آءِ ايم ايف سبب وڌيا، آءِ ايم ايف سان معاهدو به ڪيو پر قوم جو خيال رکيو. اڳوڻي وزيراعظم چيو ته هن کانسواءِ اسان ايف اي ٽي ايف لاءِ قانون سازي ڪري ها، مون کي ساڍي 3 سالن کان بار بار بليڪ ميل ڪيو پيو وڃي، هي رڳو هڪ ٻيو اين آر او چاهين ٿا. هن چيو ته آءِ ايم ايف پروگرام ۾ هجڻ باوجود هيلٿ انشورنس ڏني ۽ پيٽرول ۽ ڊيزل تي سبسڊي ڏني. اڳوڻي وزيراعظم چيو ته ڊالر 208 تي پهچي ويو آهي، خدشو آهي ته پاڪستان ۾ به سريلنڪا جهڙيون حالتون پيدا نه ٿين. هن غير جانبدار ڌرين کي چيو ته جيڪڏهن سازش ڪامياب ٿي ته معيشت تباهه ٿي ويندي ۽ جيڪڏهن معيشت تباهه ٿي ته ملڪ سنڀالڻ نه ڏنو ويندو. عمران خان چيو ته نيب اسان جي دور ۾ 480 ارب رپيا واپس ڪيا ۽ هاڻي جڏهن هي نئون نيب قانون لاڳو ٿيندو ته سندن 1200 ارب رپين جا ڪرپشن ڪيس سڀاڻي ختم ٿي ويندا. هن وڌيڪ چيو ته خرم دستگير جي بيان مان ثابت ٿيو ته هو رڳو اين آر او وٺڻ لاءِ حڪومت ۾ آيو.