اسلام آباد:(اڱارو 12 آگسٽ 2025ع) بين الاقوامي ثالثي عدالت فيصلو ڏنو آهي ته ڀارت مغربي دريائن جو پاڻي پاڪستان جي غير محدود استعمال لاءِ ڇڏي ڏنو آهي.
پرڏيهي آفيس جي ترجمان موجب، سنڌو پاڻي معاهدي جي عام تشريح تي فيصلو 8 آگسٽ تي عالمي ثالثي عدالت پاران اعلان ڪيو ويو هو، پر سومر تي عدالت جي ويب سائيٽ تي جاري ڪيو ويو.
ترجمان موجب، عدالت فيصلو ڏنو ته ڀارت کي معاهدي ۾ مقرر ڪيل شرطن مطابق، هائيڊرو پاور منصوبن کانسواءِ، پاڪستان جي غير محدود استعمال لاءِ مغربي دريائن جو پاڻي ڇڏڻ گهرجي.
ترجمان چيو ته عدالت فيصلو ڏنو ته ثالثي عدالت جا فيصلا آخري ۽ ڌرين تي پابند آهن.
پرڏيهي آفيس جي ترجمان موجب، پاڪستان ثالثي عدالت جي سنڌو پاڻي معاهدي جي عام تشريح تي فيصلي جو استقبال ڪيو آهي.
ترجمان چيو ته اهو فيصلو هندستان جي نئين رن آف ريور منصوبن جي ڊيزائن معيار جي تشريح ڪري ٿو، اهو فيصلو گهٽ سطح جي آئوٽ ليٽس، گيٽڊ اسپل ويز، ٽربائن انٽيڪس ۽ فري بورڊ تي پاڪستان جي موقف سان مطابقت رکي ٿو.
پرڏيهي آفيس جي ترجمان موجب، اهو فيصلو هندستان کي وڌيڪ پاڻي ذخيرو ڪرڻ جي اجازت نٿو ڏئي.
پرڏيهي آفيس جي ترجمان چيو ته هي فيصلو هندستان جي سنڌو پاڻي معاهدي کي معطل ڪرڻ جي اعلان جي تناظر ۾ خاص اهميت رکي ٿو. اهو فيصلو پاڪستان جي ڪمزور پوزيشن کي هڪ هيٺاهين ملڪ جي حيثيت سان تسليم ڪري ٿو. اهو فيصلو پاڪستان جي تاريخي موقف جي تصديق آهي.
پرڏيهي آفيس جي ترجمان موجب، پاڪستان معاهدي تي مڪمل عمل درآمد لاءِ پرعزم آهي ۽ اميد رکي ٿو ته هندستان فيصلي تي عمل درآمد ڪندو.
0 تبصرے
Do not use vulgar language