آمريڪا ٻاهرين ملڪن کان ايندڙ ننڍن پيڪيجز تي ٽيرف جي رعايت ختم ڪري ڇڏي

واشنگٽن:(جمعو 29 آگسٽ 2025ع)آمريڪا ٻاهرين ملڪن کان ايندڙ ننڍن پيڪيجز تي ٽيرف جي ڇوٽ ختم ڪري ڇڏي آهي. پرڏيهي ميڊيا موجب، ٽرمپ انتظاميا 800 ڊالر تائين جي پارسلن لاءِ ٽيرف جي ڇوٽ ختم ڪري ڇڏي آهي، جنهن سان ننڍن ڪاروبارن ۾ خدشا پيدا ٿيا آهن، جڏهن ته ان قدم سان قيمتون وڌڻ جو به خدشو آهي. ٽرمپ انتظاميا موجب، گهٽ قيمت وارن پارسلن ذريعي ٽيرف کان بچيو ويندو آهي ۽ منشيات اسمگل ڪيون وينديون هيون. رپورٽ موجب، ڪجهه ذاتي شين ۽ تحفن لاءِ ڇوٽ باقي آهي. اهو ياد رکڻ گهرجي ته اڳ ۾ اهو ٻڌايو ويو هو ته 25 ملڪن آمريڪي ٽيرف جي ڪري آمريڪا ڏانهن پارسل سروسز معطل ڪري ڇڏيون آهن. ٽرمپ انتظاميا اعلان ڪيو هو ته 29 آگسٽ کان آمريڪا ۾ داخل ٿيندڙ ننڍن پارسلن تي ٽيڪس جي ڇوٽ ختم ڪئي ويندي.