سنڌ ۾ اربع کان مها ٻوڏ: گڊو تي 8 لک ڪيوسڪ پاڻي پهچندو: 52 هزار ڪٽنب بي گهر ٿيندا: سنڌ سرڪار

سکر:(ڇنڇر 30 آگسٽ 2025ع)سنڌ سرڪار اربع 3 سيپٽمبر تي گڊو بئراج تي سپر فلڊ (مها ٻوڏ) جي وارننگ جاري ڪندي ڄاڻايو آهي ته اربع ۽ خميس جي وچ واري رات جو گڊو بئراج وٽ پاڻيءَ جو وهڪرو7 لکن کان 8 لک ڪيوسڪ تائين پهچڻ جو امڪان آهي، مها ٻوڏ سبب ابتدائي طور تي 52 هزار کان وڌيڪ خاندان متاثر ٿي سگهن ٿا، جن جي منتقلي لاءِ 178 ٻيڙين ۽ 500 ڪيمپن جو بندوبست ڪيو پيو وڃي، ان ڏس ۾ سنڌ جي وڏي وزير سيد مراد شاهه جي صدارت ھيٺ وزيراعليٰ هائوس ۾ اعليٰ سطحي هنگامي اجلاس ٿيو. جنهن ۾ صوبي ۾ امڪاني برساتن ۽ 3 ۽ 4 سيپٽمبر تي گڊو بئراج وٽ ايندڙ مها ٻوڏ کي منهن ڏيڻ لاءِ تيارين جو جائزو ورتو ويو. اجلاس کي آبپاشي کاتي ۽ پي ڊي ايم اي جي عملدارن بريفنگ ڏيندي چيو ته اربع ۽ خميس جي وچ واري رات تائين گڊو بئراج وٽ پاڻيءَ جو وهڪرو 7 لکن کان 8 لک ڪيوسڪ تائين پهچڻ جو امڪان آهي، پي ڊي ايم اي موجب مها ٻوڏ سبب 52 هزار کان وڌيڪ خاندان متاثر ٿي سگهن ٿا، اتر وارن ضلعن ۾ 72 ۽ ڏکڻ وارن ضلعن ۾ 106 ريسڪيو ٻيڙيون مقرر ڪيون ويون آهن، اجلاس ۾ وڏي وزير اتر وارن ضلعن ۾ 30 هزار کان وڌيڪ ريسڪيو 1122 عملي جي مقرري ۽ ڪمزور ضلعن ۾ ٻيڙين جي ورڇ جي هدايت ڪئي. سکر کي 6، گھوٽڪي، خيرپور، شڪارپور، نوشهروفيروز ۽ دادو کي 4-4، ۽ شهيد بينظيرآباد کي 3 ٻيڙيون ڏنيون وينديون، وڏي وزير سکر کان دادو تائين ٻيڙين سميت ريسڪيو ٽيمون مقرر ڪرڻ جو حڪم ڏنو، اجلاس کي ٻڌايو ويو ته پاڪستان نيوي جون 26 ٻيڙيون رليف آپريشن لاءِ اسٽينڊ باءِ تي رکيل آهن، اجلاس کي پي ڊي ايم اي جي اسٽاڪ پوزيشن بابت ٻڌايو ويو ته مڇردانيون، ڪمبل، فرسٽ ايڊ ڪٽون، ڪچن سيٽ، گدا، پلاسٽڪ شيٽ، موبائل ٽائليٽس، سِوڙيون، جيري ڪين، سليپنگ ميٽ، ٽينٽ، ڊي واٽرنگ پمپ ۽ جنريٽر ڪافي مقدار ۾ موجود آهن، مراد علي شاهه پي ڊي ايم اي ۽ ضلعي انتظاميا کي هدايت ڪئي ته دريائي بندن تي 500 کان وڌيڪ ڪيمپ قائم ڪرڻ جي تياري ڪئي وڃي ته جيئن متاثر ٿيل آبادي ۽ چوپايو مال محفوظ ٿي سگهن۔ هن زور ڏنو ته جيڪڏهن وڏو وهڪرو اچي ته نه ڪا انساني ۽ نه ئي جاندار جي جان وڃڻ گهرجي، اجلاس ۾ وڏي وزير گڊو بئراج ۽ سکر بئراجن جو دورو ڪرڻ ۽ سنڌو درياءِ جي سڀني ڪمزور بندن جو فضائي جائزو وٺڻ جو فيصلو ڪيو، اجلاس کي آگاهي ڏني وئي ته جيڪڏهن وڏي ٻوڏ آئي ته 50 هزار کان وڌيڪ خاندان بي گهر ٿي سگهن ٿا، مراد علي شاهه انتظاميا کي مڪمل تيارين کي يقيني بڻائڻ ۽ ضرورت پوڻ تي نجي شعبي کان به هيوي مشينري حاصل ڪرڻ جي هدايت ڪئي. اسلام آباد(رپورٽ: ايم بي سومرو) اين ڊي ايم اي اختيارين چيو آهي ته پنجاب جي ٽِنهي دريائن ۾ موجود ٻوڏ واري صورتحال سبب سنڌو ندي ۾ مهاٻوڏ جا امڪان آهن، 3 کان 4 سيپٽمبر دوران 9 لک کان ساڍا 9 لک ڪيوسڪ تائين ٻوڏ جا وهڪرا پنجند وٽان مان گذرڻ جا امڪان آهي. امڪاني نقصان کان بچاءَ لاءِ مختلف بند ٽوڙڻ ۽ وهڪري جو رخ بدلائڻ جي صورت ۾ به 8 لک 25 هزار کان 9 لک ڪيوسڪ ٻوڏ جا وهڪرا پهچڻ جو امڪان آهي. اهڙي صورتحال ۾ سنڌ جي پهرين بئراج گڊو تي 5 کان 6 سيپٽمبر تي پاڻي وهڪرا 8 لک کان 11 لک ڪيوسڪ ٿيڻ جو امڪان آهي. خطرناڪ صورتحال کان بچاءَ لاءِ بند ٽوڙي وهڪري جو رخ تبديل ڪرڻ سان پاڻي وهڪرا گهٽجي ساڍا 7 لک کان 9 لک ڪيوسڪ ٿي سگهن ٿا. انهي بئراج تي مجموعي طور پاڻي وهڪرا 12 لک ڪيوسڪ تائين به پهچي سگهن ٿا، جيڪو انتهائي مٿين درجي جي ٻوڏ واري صورتحال پيدا ڪندا. اين ڊ ايم اي مطابق سکر بئراج تي 6 کان 7 سيپٽمبر دوران 8 لک کان 11 لک ڪيوسڪ پاڻي جا وهڪرا پهچڻ جو امڪان آهي. ساڳئي ريت ڪوٽڙي بئراج ۾ 8 کان 9 سيپٽمبر دوران 8 لک کان 10 لک ڪيوسڪ پاڻي پهچڻ جو امڪان آهي. اين ڊي ايم اي چيو آهي ته سنڌ لاءِ 12 کان 13 سيپٽمبر تائين هاءِ الرٽ جاري ڪيو ويو آهي.مها ٻوڏ سبب بند اوور فلو/ ٽاپ، بند ٽٽڻ ۽ هيٺاهين وارا علائقا پاڻي هيٺ اچڻ جو خدشو آهي، جن جي بچاءٌ لاءِ تڪڙا قدم کنيا وڃن. اين ڊي ايم اي چيو آهي ته ٻوڏ جي وهڪرن سبب زرعي زمينون، آس پاس وارا آباد علائقا ۽ ڳوٺ متاثر ٿي سگهن ٿا. اين ڊي ايم اي صلاح ڏني آهي ته عوام مها ٻوڏ وارن علائقن مان ٻاهر نڪرڻ لاءِ تيار رهي هڪ ٻي پڌرائي ۾ اين ڊي ايم اي قومي ايمرجنسي آپريشن سينٽر راوي ندي ۾ ٻوڏ واري صورتحال ۾ اضافي بابت الرٽ جاري ڪري ڪندي چيو آهي ته 30 آگسٽ کان 3 سيپٽمبر تائين راوي جي مٿانهن علائقن ۾ برساتون پوڻ ڀارت جي ڊيمن مان وڌيڪ پاڻي ڇڏجڻ جو امڪان آهي. ٻوڏ وارا وهڪرا اچڻ سبب راوي جي وهڪرن ۾ وڌيڪ اضافي جو امڪان موجود آهي. راوي ۾ بلونڪي جي هنڌ تي هن وقت لڳ ڀڳ 1 لک 47 هزار ڪيوسڪ پاڻي موجود آهي. 2 کان 3 سيپٽمبر دوران ٻوڏ وارو وهڪرو سڌنائي پهچندو، جتي وهڪرو 1 لک 25 هزار کان 1 لک 50 هزار ڪيوسڪ تائين ٿيڻ جو امڪان آهي. ٻوڏ سبب لاهور سٽي ۽ رائونڊ جا علائقا متاثر ٿي سگهن ٿا. اين ڊي ايم اي موجب چناب ندي ۾ چنيـوٽ پل تي وهڪرا 8 لک 55 هزار ڪيوسڪ آهن ، جهنگ وٽ 3 گهارا وجهڻ بعد جھنگ پل مان گذرندڙ 4 لک 96 هزار ڪيوسڪ مان لڳ ڀڳ 1 لک کان ڏيڍ لک ڪيوسڪ پاڻي جو رخ موڙيو ويو. ٻوڏ واري وهڪري جو رخ مٽجڻ سان 25–30 ڳوٺ محفوظ ٿي ويا. اين ڊي ايم اي هنگامي اطلاع ڏيندي چيو آهي ته ستلج ندي ۾ غير معمولي سطح جا ٻوڏ وهڪرا موجود آهن، گنڊا سنگهه والا تي صورتحال خطري واري آهي. جتي ساڍا ٽي لک ڪيوسڪ کان وڌيڪ وهڪرا ريڪارڊ ڪيا ويا آهن، اين ڊي ايم اي موجب برساتن ۽ ڀارت طرفان امڪاني ٻوڏ وارا وڌيڪ وهڪرا ڇڏڻ سان صورتحال وڌيڪ سنگين ٿي سگهي ٿي.