اسرائيل غزه شهر جي ڏکڻ زيتون علائقي ۾ سڀئي عمارتون ڊاهي ڇڏيون

زيتون:(خميس 28 آگسٽ 2025ع)غزه سول ڊفينس جي مطابق، اسرائيلي زميني آپريشن دوران غزه شهر جي زيتون پاڙي جي ڏکڻ حصي ۾ هڪ به عمارت صحيح نه رهي. غزه سول ڊفينس چيو ته اسرائيل هن مهيني جي شروعات ۾ غزه شهر تي قبضو ڪرڻ لاءِ زميني آپريشن شروع ڪيو، جنهن کان پوءِ زيتون علائقي ۾ 1,500 کان وڌيڪ گهر تباهه ٿي ويا. ريسڪيو سروس جي ترجمان محمود باسل انادولو نيوز ايجنسي کي ٻڌايو ته پاڙي جي ڏکڻ حصي ۾ ڪا به عمارت نه بچي، هن وڌيڪ چيو ته انهن هٿيارن علائقي ۾ تباهي جي شدت کي وڌايو آهي. هن چيو ته اسرائيلي فوج تعميراتي مشينري ۽ بم سان ڀريل روبوٽس استعمال ڪيا، جيڪي روزانو ست هنڌن تي ڌماڪا ڪندا آهن، جڏهن ته ڊرون استعمال ڪندي گهرن جي ڇتين تي ڌماڪيدار مادو اڇلايو ويندو هو. هن وڌيڪ چيو ته منظم تباهي زيتون جي 80 سيڪڙو رهواسين کي پنهنجو علائقو ڇڏڻ ۽ اولهه يا اتر غزه شهر ڏانهن لڏپلاڻ ڪرڻ تي مجبور ڪيو آهي.