ملڪ ۾ مون سون جي برساتن سبب فوتين جو انگ 221 ٿي ويو

اسلام آباد:(اڱارو 22 جولاءِ 2025ع)ملڪ ۾ تازين مون سون جي برساتن سبب گذريل 24 ڪلاڪن ۾ وڌيڪ پنج ماڻهو فوت ٿي ويا آهن، جنهن سان ڪُل فوتين جو انگ 221 ٿي ويو آهي. نيشنل ڊيزاسٽر مئنيجمينٽ اٿارٽي (اين ڊي ايم اي) موجب، گذريل 24 ڪلاڪن ۾ برساتن سبب پنج ماڻهو فوت ۽ 10 زخمي ٿيا آهن، جن ۾ ٻه مرد ۽ ٽي ٻار شامل آهن. اين ڊي ايم اي جي رپورٽ ۾ چيو ويو آهي ته برساتن سبب هاڻي تائين 221 ماڻهو فوت ۽ 592 زخمي ٿيا آهن، جن ۾ 77 مرد، 40 عورتون ۽ 104 ٻار شامل آهن. اين ڊي ايم اي موجب، برساتن سبب هاڻي تائين سڀ کان وڌيڪ فوتگيون پنجاب ۾ 135 ٿيون آهن جڏهن ته 470 ماڻهو زخمي ٿيا آهن. خيبر پختونخواهه ۾ برساتن سبب 40 ماڻهو فوت ۽ 69 زخمي ٿيا آهن. اين ڊي ايم اي جي رپورٽ ۾ چيو ويو آهي ته سنڌ ۾ برساتن سبب 22 ماڻهو فوت ۽ 40 زخمي ٿيا آهن، جڏهن ته بلوچستان ۾ برساتن سبب 16 ماڻهو فوت ٿيا آهن. گلگت بلتستان ۾ برسات سبب 3 ماڻهو زخمي ٿيا، ۽ آزاد ڪشمير ۾ برسات سبب هڪ شخص فوت ۽ 6 ماڻهو زخمي ٿيا، اسلام آباد ۾ برسات سبب هڪ شخص فوت ٿيو. اين ڊي ايم اي موجب، سڀ کان وڌيڪ موت گهر ٽٽڻ، ٻڏڻ، لينڊ سلائيڊنگ، تيز ٻوڏ، بجلي ڪرنٽ ۽ بجلي ڪرڻ سبب ٿيا. اين ڊي ايم اي جي رپورٽ ۾ چيو ويو آهي ته گذريل 24 ڪلاڪن ۾ برساتن سبب 25 گهر ٽٽي پيا ۽ 5 ڍور پڻ مارجي ويا. هاڻي تائين 804 گهر ٽٽي پيا ۽ 200 ڍور مينهن سبب مارجي ويا آهن. پنجاب ۾ سڀ کان وڌيڪ گهر ٽٽي پيا، 168 گهر جزوي طور تي ٽٽي پيا. خيبرپختونخواهه ۾ 142 گهر جزوي طور تي ٽٽي پيا ۽ 78 مڪمل طور تي ٽٽي پيا. سنڌ ۾ 54 گهر جزوي طور تي ٽٽي پيا ۽ 33 مڪمل طور تي ٽٽي پيا. اهڙي طرح بلوچستان ۾ 56 گهر جزوي طور تي ٽٽي پيا ۽ 8 مڪمل طور تي ٽٽي پيا، جڏهن ته گلگت بلتستان ۾ 71 گهر جزوي طور تي ٽٽي پيا ۽ 66 مڪمل طور تي ٽٽي پيا. ان کان علاوه، آزاد ڪشمير ۾ 75 گهر جزوي طور تي ٽٽي پيا ۽ 17 مڪمل طور تي ٽٽي پيا. اسلام آباد ۾ 35 گهر جزوي طور تي ٽٽي پيا ۽ هڪ مڪمل طور تي ٽٽي پيو. اين ڊي ايم اي جو چوڻ آهي ته ڪڪر ڦاٽڻ سبب بابوسر ۾ ٻوڏ واري صورتحال آهي. بابوسر ٽاپ جي چوڌاري 7 کان 8 ڪلوميٽر جي علائقي ۾ سخت لينڊ سلائيڊنگ ۽ ٻوڏ آئي آهي. 14 کان 15 هنڌن تي رستا بند آهن. چلاس ۾ مختلف هنڌن تي ڦاٿل سياحن کي محفوظ هنڌن تي منتقل ڪيو ويو آهي.