غزہ:(خميس 26 جون 2025ع)غزه ۾ اسرائيلي ظلم جاري آهي، تازين اسرائيلي حملي ۾ 78 وڌيڪ فلسطيني قتل ٿي ويا آهن.
عرب ميڊيا موجب، غزه جي مختلف اسپتالن مان مليل معلومات موجب، اربع جي صبح کان وٺي اسرائيلي فوج جي ڪارروائي ۾ گهٽ ۾ گهٽ 78 فلسطيني شهيد ٿي چڪا آهن، جن ۾ 14 بي گهر ماڻهو به شامل آهن جيڪي امداد حاصل ڪرڻ لاءِ گڏ ٿيا هئا.
غزه جي اسپتالن جي ذريعن موجب، اربع جي صبح اسرائيلي فوج مرڪزي غزه ۾ امداد جي انتظار ۾ فلسطينين تي فائرنگ ڪئي.
غزه جي اختيارين موجب، مئي کان وٺي امدادي مرڪزن تي اسرائيل پاران 500 کان وڌيڪ فلسطيني قتل ڪيا ويا آهن.
ٻئي طرف، حماس خان يونس ۾ هڪ وڏو آپريشن ڪيو ۽ هڪ اسرائيلي بکتر بند گاڏي کي ڌماڪيدار مادو سان اڏائي ڇڏيو، جنهن ۾ 7 اسرائيلي فوجي مارجي ويا.
ان دوران، آمريڪي صدر ڊونلڊ ٽرمپ دعويٰ ڪئي آهي ته جنگ ختم ڪرڻ جي طرف اهم اڳڀرائي ٿي رهي آهي.
آمريڪي صدر ڊونلڊ ٽرمپ اميد ظاهر ڪئي ته اسرائيل ۽ حماس جي وچ ۾ تقريبن ٻن سالن کان هلندڙ جنگ جلد ختم ٿي سگهي ٿي.
0 تبصرے
Do not use vulgar language