واشنگٽن:(خمیس 15 مئي 2025ع)آمريڪا ايران جي بيلسٽڪ ميزائل پروگرام تي نيون پابنديون لاڳو ڪري ڇڏيون آهن.
پرڏيهي خبرون ڏيندڙ اداري موجب، آمريڪا اربع ڏينهن ايران جي بيلسٽڪ ميزائل پروگرام جي حمايت ڪندڙ ڇهن فردن ۽ 12 ڪمپنين تي نيون پابنديون لاڳو ڪيون آهن، جن ۾ ڪيترائي چيني شهري به شامل آهن.
ٽرمپ انتظاميا تازن هفتن ۾ ايران جي تيل جي صنعت ۽ ايٽمي پروگرام سان لاڳاپيل فردن ۽ ادارن تي ڪيتريون ئي پابنديون لاڳو ڪيون آهن.
آمريڪي خزاني کاتي موجب، اربع تي لاڳو ڪيل نئين پابنديون انهن تنظيمن کي نشانو بڻائين ٿيون جيڪي ايراني حڪومت کي مقامي طور تي اهم مواد تيار ڪرڻ ۾ مدد ڪري رهيون آهن جيڪي تهران جي بيلسٽڪ ميزائل پروگرام لاءِ ضروري آهن.
آمريڪي خزاني واري سيڪريٽري اسڪاٽ بيسنت هڪ بيان ۾ چيو ته آمريڪا ايران کي بين البراعظمي بيلسٽڪ ميزائل تيار ڪرڻ جي اجازت نٿو ڏئي سگهي.
هن وڌيڪ چيو ته ايران جي مقامي طور تي ميزائل ۽ انهن جا حصا ٺاهڻ جون ڪوششون آمريڪا ۽ خطي جي استحڪام لاءِ هڪ ناقابل قبول خطرو پيدا ڪن ٿيون.
اهو ياد رکڻ گهرجي ته اهي قدم اهڙي وقت ۾ کنيا ويا آهن جڏهن آمريڪا ۽ ايران جي وچ ۾ ايٽمي ڳالهيون ٿي رهيون آهن.
ٻنهي ملڪن جي وچ ۾ ڳالهيون گذريل مهيني شروع ٿيون، جن جو مقصد ايران کي ايٽمي هٿيار ٺاهڻ کان روڪڻ لاءِ هڪ نئين معاهدي تي پهچڻ هو.
0 تبصرے
Do not use vulgar language