تل ابيب:(جمعو 30 مئي 2025ع)اسرائيل جي انتهائي ساڄي ڌر جي قومي سلامتي واري وزير اتمار بين گوئر جو چوڻ آهي ته غزه ۾ مڪمل فوجي طاقت استعمال ڪرڻ جو وقت آهي.
العربيه ۾ شايع ٿيل هڪ رپورٽ موجب، اسرائيلي وزير اتمار بين گوئر جو بيان فلسطيني مزاحمتي تنظيم حماس پاران جنگ بندي جي نئين آمريڪي تجويز کي رد ڪرڻ کان پوءِ آيو، جنهن تي اسرائيل متفق آهي.
اسرائيل ۽ حماس جي وچ ۾ تقريبن 20 مهينن جي جنگ کي ختم ڪرڻ لاءِ ڳالهين ۾ ڪا به اڳڀرائي نه ٿي آهي. اسرائيل مارچ ۾ ڇهن هفتن جي جنگ بندي ختم ٿيڻ کان پوءِ غزه ۾ حملا ٻيهر شروع ڪري ڇڏيا آهن.
قومي سلامتي واري وزير اتمار بين گوئر، ٽيليگرام چينل تي اسرائيلي وزيراعظم نتنياهو کي خطاب ڪندي چيو ته حماس پاران نئين معاهدي جي تجويز کي رد ڪرڻ کان پوءِ هاڻي ڪو به بهانو ناهي.
هن چيو ته مونجهارو، انتشار ۽ ڪمزوري ختم ٿيڻ گهرجي، اسان اڳ ۾ ئي ڪيترائي موقعا وڃائي چڪا آهيون، اهو وقت آهي ته حماس کي مڪمل فوجي طاقت سان ختم ڪيو وڃي.
ياد رهي ته وائيٽ هائوس خميس ڏينهن چيو هو ته صدر ڊونلڊ ٽرمپ ۽ آمريڪي سفير اسٽيو وٽڪوف حماس کي جنگ بندي جي تجويز پيش ڪئي، جنهن تي اسرائيل متفق آهي.
وائيٽ هائوس جي پريس سيڪريٽري ڪيرولائن ليوٽ چيو ته مزاحمتي تنظيم سان ڳالهيون جاري آهن.
خميس ڏينهن، حماس جي سياسي بيورو ميمبر باسم نعيم چيو ته نئين تجويز جو مطلب آهي قتل ۽ قحط جو تسلسل جيڪو اسان جي ڪنهن به مطالبي کي پورو نٿو ڪري.
باسم نعيم چيو ته ان جي باوجود، تنظيم جي قيادت مڪمل ذميواري سان تجويز جو مطالعو ڪري رهي آهي.
0 تبصرے
Do not use vulgar language