سنڌ ۽ پنجاب ۾ سوين ايڪڙ ڪڻڪ جي فصل کي باهه لڳڻ سبب ساڙيو ويو

لوڌران:(آچر 27 اپريل 2025ع)سنڌ ۽ پنجاب جي مختلف علائقن ۾ سوين ايڪڙ ڪڻڪ جي فصل کي باهه لڳي وئي، جنهن سبب لکين رپين جي ڪڻڪ سڙي وئي. گذريل ٻن هفتن دوران ڪڻڪ جي فصل کي باهه لڳڻ جا ڪيترائي واقعا رپورٽ ٿيا آهن. لوڌران ۾ ٻن هفتن ۾ 30 واقعن ۾ ۽ حافظ آباد ۾ هڪ هفتي ۾ 17 واقعن ۾ 300 ايڪڙن تي ڪڻڪ سڙي وئي. ساهيوال، ڊي جي خان، سرگوڌا، گوجرانوالا، بهاولپور ۽ شڪرڳڙهه ۾ به ڪيترائي ايڪڙ ڪڻڪ سڙي رک ٿي وئي، جنهن سبب آبادگارن کي ڪروڙين رپين جو نقصان پهتو. سنڌ جي شهر نوشهروفيروز ۾ ڪڻڪ جي فصل ۾ باهه لڳڻ سبب لکين رپين جو نقصان ٿيو. باهه لڳڻ جو سبب معلوم نه ٿي سگهيو آهي، پر بچاءُ عملدارن موجب، ڪڻڪ جي باهه جو سڀ کان عام سبب ڪڻڪ جي باقيات کي ساڙڻ آهي، جيڪو ويجهو بيٺل فصلن کي باهه ڏئي ٿو. ڪڏهن ڪڏهن، ڪڻڪ جي فصل وٽان لنگهندڙ ماڻهو ٻاريل سگريٽ ٻنين ۾ اڇليندا آهن، جنهن جي ڪري باهه به لڳندي آهي. ريسڪيو عملدارن وڌيڪ چيو ته شڪرڳڙهه ۾ شادي جي مهمانن پاران فائر ڪيل آتشبازي ڪڻڪ جي فصل ۾ باهه جو سبب بڻي.