پاڪ فوج ايل او سي جي ڀڃڪڙي ڪرڻ تي ڀارتي جاسوس ڪواڊ ڪاپٽر کي ڪيرائي ڇڏيو

راولپنڊي:(اڱارو 29 اپريل 2025ع)پاڪ فوج لائن آف ڪنٽرول (ايل او سي) جي خلاف ورزي ڪرڻ تي هڪ ڀارتي ڪواڊ ڪاپٽر کي ڪيرائي ڇڏيو. سيڪيورٽي ذريعن موجب، دشمن ڀمبر جي مناور سيڪٽر ۾ ڪواڊ ڪاپٽر استعمال ڪندي جاسوسي ڪرڻ جي ڪوشش ڪئي، پر پاڪ فوج ايل او سي تي هوائي حدن جي خلاف ورزي کي ناڪام بڻائيندي، ڀارتي ڪواڊ ڪاپٽر کي ڪيرائي ڇڏيو. سيڪيورٽي ذريعن جو چوڻ آهي ته پاڪستاني فوج بروقت ڪارروائي ڪندي دشمن جي هن ناپاڪ ڪوشش کي ناڪام بڻائي ڇڏيو. پاڪستان جي فوج دشمن جي ڪنهن به جارحيت جو فوري ۽ اثرائتي جواب ڏيڻ لاءِ تيار آهي. هندستان-پاڪستان تڪرار ياد رهي ته 22 اپريل تي والاريل ڪشمير جي پهلگام ۾ هڪ سياحتي هنڌ تي فائرنگ جي واقعي ۾ 26 ماڻهو مارجي ويا ۽ هڪ درجن جي لڳ ڀڳ زخمي ٿيا هئا، جنهن کان پوءِ ڀارت بنا ڪنهن ثبوت جي پاڪستان تي الزام لڳائڻ شروع ڪيو ۽ هڪ طرفي طور تي سنڌو پاڻي معاهدو معطل ڪيو. جڏهن ته، پاڪستان نه رڳو پهلگام واقعي جي مذمت ڪئي، پر وزيراعظم شهباز شريف اهو به آڇ ڪئي ته جيڪڏهن هندستان معاملي جي غير جانبدار جاچ ڪرڻ چاهي ٿو ته پاڪستان هر قسم جي تعاون لاءِ تيار آهي. ڀارت به پاڪستان خلاف ڪارروائي جا جرئتمندانه دعوائون ڪري رهيو آهي، پر پاڪستان جي سياسي ۽ فوجي قيادت واضح ڪري ڇڏيو آهي ته ڪنهن به اشتعال انگيز ڪارروائي جو جواب اهڙو ڏنو ويندو جيڪو ڀارت هميشه ياد رکندو.