آءِ ايم ايف پاڪستان جي معاشي شرح نمو جو تخمينو وڌيڪ گهٽائي ڇڏيو

اسلام آباد:(اربع 23 اپريل 2025ع)آءِ ايم ايف جي ورلڊ اڪنامڪ آئوٽ لُڪ رپورٽ جا تفصيل سامهون آيا آهن، جنهن ۾ آءِ ايم ايف هلندڙ مالي سال لاءِ پاڪستان جي معاشي واڌ جي اڳڪٿي کي وڌيڪ گهٽائي ڇڏيو آهي. آءِ ايم ايف پاڪستان جي معاشي واڌ جي اڳڪٿي 3 سيڪڙو کان گهٽائي 2.6 سيڪڙو ڪري ڇڏي آهي. آءِ ايم ايف ايندڙ مالي سال لاءِ پاڪستان جي معاشي ترقي جي شرح ۾ گهٽتائي جو به اندازو لڳايو آهي. آءِ ايم ايف جي ورلڊ اڪنامڪ آئوٽ لُڪ رپورٽ موجب، جنوري 2025 ۾، آءِ ايم ايف موجوده مالي سال لاءِ پاڪستان جي معاشي ترقي جي شرح 3 سيڪڙو جو اندازو لڳايو هو. آڪٽوبر 2024 ۾، آءِ ايم ايف موجوده مالي سال لاءِ پاڪستان جي معاشي ترقي جي شرح جو اندازو 3.2 سيڪڙو لڳايو هو. خدشو آهي ته پاڪستان جي معاشي ترقي جي شرح موجوده مالي سال لاءِ مقرر ڪيل هدف حاصل نه ڪري سگهندي.