آمريڪا جي لڳ ڀڳ ٻه درجن رياستن ۾ ٽرمپ انتظاميا خلاف ڪيس داخل

واشنگٽن: (اربع 02 اپريل 2025ع)آمريڪا جي لڳ ڀڳ 2 درجن رياستن صحت جي شعبي لاءِ اربين ڊالرن جي فنڊنگ ۾ ڪٽوتي تي ٽرمپ انتظاميا خلاف ڪيس داخل ڪيو آهي. رياستي اٽارني جنرلن جي اتحاد 2 اپريل تي ٽرمپ انتظاميا خلاف ڪيس داخل ڪيو. آمريڪي صدر ڊونلڊ ٽرمپ جي انتظاميا ملڪ ۾ ڪيترن ئي طبي منصوبن ۽ ڪووڊ-19 سان لاڳاپيل قدمن لاءِ وفاقي فنڊنگ ۾ 11 ارب ڊالر گهٽائڻ جو فيصلو ڪيو آهي. 23 رياستن جي طرفان روڊ آئلينڊ جي وفاقي عدالت ۾ ڪيس داخل ڪيو ويو. نيويارڪ رياست، ڪولوراڊو، ڪولمبيا ضلعي، پنسلوانيا ۽ ٻين رياستن پاران داخل ڪيل مقدمي ۾ چيو ويو آهي ته ڪٽوتي غير قانوني هئي ۽ وفاقي حڪومت ڪٽوتين لاءِ ڪو به منطقي جواز پيش نه ڪيو هو. مقدمي ۾ چيو ويو آهي ته هي ڪٽوتي عوامي صحت کي سخت نقصان پهچائيندي جڏهن ته رياستن ۾ مستقبل ۾ وبائي مرضن ۽ ٻين عام بيمارين جي پکڙجڻ جو خطرو تمام گهڻو وڌائيندي. مقدمي ۾ عدالت کان مطالبو ڪيو ويو آهي ته ٽرمپ انتظاميا کي فوري طور تي انهن فنڊن ۾ ڪٽوتي ڪرڻ کان روڪيو وڃي جيڪي وبا دوران ايوان نمائندگان پاران مختص ڪيا ويا هئا، جن مان گهڻو حصو ڪووڊ سان لاڳاپيل قدمن جهڙوڪ ٽيسٽنگ ۽ ويڪسينيشن تي خرچ ڪيو پيو وڃي. اهي فنڊ مختلف ذهني صحت جي پروگرامن جي فنڊ لاءِ پڻ استعمال ڪيا پيا وڃن. نيويارڪ جي اٽارني جنرل ليٽيشيا جيمس چيو ته فنڊنگ ۾ ڪٽوتي اوپيوائيڊ بحران کي ڪنٽرول ڪرڻ ۾ ٿيندڙ اڳڀرائي کي رد ڪندي جڏهن ته ذهني صحت جي نظام کي نقصان پهچائيندي. ٻئي طرف، آمريڪي صحت ۽ انساني خدمتن واري کاتي ملازمن کي نوٽيس جاري ڪيا آهن ۽ 10,000 ماڻهن کي برطرف ڪرڻ جو امڪان آهي. پر آمريڪي پرڏيهي کاتي ڪٽوتين تي ٿيندڙ احتجاجن تي بيان جاري ڪرڻ کان پاسو ڪيو آهي. گذريل هفتي تنظيم پاران جاري ڪيل هڪ بيان ۾ چيو ويو آهي ته ٽيڪس ڏيندڙن جا اربين ڊالر هاڻي هڪ اهڙي وبا تي ضايع نه ٿيندا جيڪا ختم ٿي چڪي آهي. هي بيان مارچ ۾ سي ڊي سي پاران جاري ڪيل انگن اکرن موجب آمريڪا ۾ هر هفتي سراسري طور تي 411 ماڻهو ڪووڊ-19 کان مري رهيا آهن، جيتوڻيڪ وفاقي پبلڪ هيلٿ ايمرجنسي ختم ڪئي وئي آهي. رياستي طبي ادارا فنڊنگ جي کوٽ جي اثر جو جائزو وٺي رهيا آهن، ۽ مقدمي ۾ چيو ويو آهي ته ان جي نتيجي ۾ هزارين ماڻهو پنهنجون نوڪريون وڃائي ڇڏيندا جڏهن ته فلو ۽ خسرو جهڙين وبائي مرضن کي روڪڻ جي ڪوششن کي نقصان پهچائيندو.