واشنگٽن: (خمیس 06 مارچ 2025ع)آمريڪي صدر ڊونلڊ ٽرمپ پاران لاڳو ڪيل نئين سفري پابندين جي ڪري ايندڙ هفتي کان پاڪستان ۽ افغانستان جي رهواسين جي آمريڪا ۾ داخلا تي پابندي لڳائي سگهجي ٿي.
برطانوي نيوز ايجنسي موجب آمريڪي انتظاميا مختلف ملڪن ۾ سيڪيورٽي ۽ اسڪريننگ سسٽم جو جائزو وٺي رهي آهي، هن جائزي جي نتيجي ۾ مختلف ملڪن جي ماڻهن جي آمريڪا ۾ داخلا تي پابندي لڳائي سگهجي ٿي.
آمريڪي صدر 20 جنوري تي هڪ ايگزيڪيوٽو آرڊر جاري ڪيو، جنهن ۾ آمريڪي سلامتي لاءِ خطرن جي سڃاڻپ لاءِ آمريڪا ۾ داخل ٿيندڙ ماڻهن جي سخت اسڪريننگ جي ضرورت هئي. ٽرمپ ڪابينا جي ميمبرن کي هدايت ڪئي ته اهي ڪمزور ۽ خراب اسڪريننگ وارن ملڪن جي فهرست فراهم ڪن جن تي جزوي يا مڪمل پابنديون لاڳو ٿيڻ گهرجن.
خبرن جي اداري ذريعن جي حوالي سان ٻڌايو آهي ته افغانستان ۽ پاڪستان تي مڪمل سفري پابندي جي تجويز پيش ڪري سگهجي ٿي. نئين پابنديون هزارين افغانين کي به متاثر ڪري سگهن ٿيون جن کي آمريڪا ۾ آباد ٿيڻ جي اجازت ڏني وئي آهي.
طالبان جي انتقام جي خوف کان، آمريڪا ۾ آمريڪي فوج سان ڪم ڪندڙ افغانين کي پناهگيرن يا خاص ويزا تي آباد ڪرڻ جو فيصلو ڪيو ويو، ۽ انهن وٽ آمريڪي ويزا پڻ آهن.
0 تبصرے
Do not use vulgar language