فلوريڊا: (اربع 19 فيبروري 2025ع)آمريڪي صدر ٽرمپ آمريڪا ۽ روس جي ڳالهين کان پوءِ يوڪرين جي تڪرار جو ذميوار يوڪرين کي قرار ڏنو.
آمريڪي صدر جو چوڻ آهي ته يوڪرين کي جنگ شروع نه ڪرڻ گهرجي ها، يوڪرين هڪ معاهدو ڪري سگهي ها.
مار-ا-لاگو ۾ پنهنجي رهائشگاهه تي صحافين سان ڳالهائيندي هن چيو ته يوڪرين کي سعودي عرب ۾ آمريڪا-روس جي اعليٰ سطحي ڳالهين ۾ شامل نه ٿيڻ تي ڳڻتي آهي، پر يوڪرين وٽ ان کان اڳ 3 سال ۽ ان کان به وڌيڪ وقت هو، اهو معاملو آساني سان حل ٿي سگهي ها ۽ هڪ معاهدو ٿي سگهي ها.
رياض ۾ ملاقات جي حوالي سان آمريڪي صدر ٽرمپ چيو ته کيس يقين آهي ته هن وٽ هن جنگ کي ختم ڪرڻ جي طاقت آهي ۽ روس به وحشيانه ظلمن کي روڪڻ چاهي ٿو.
ياد رهي ته آمريڪا ۽ روس جي اعليٰ سطحي وفدن گذريل ڏينهن سعودي راڄڌاني رياض ۾ ملاقات ڪئي هئي، جنهن کان پوءِ يوڪرين ۾ جنگ ختم ڪرڻ لاءِ آمريڪا ۽ روس جي وچ ۾ ڳالهين جون ٽيمون مقرر ڪرڻ تي اتفاق ڪيو ويو هو.
آمريڪي پرڏيهي وزير مارڪو روبيو چيو ته روسي وفد چار اصولن تي متفق ٿيو آهي، پر يورپي يونين کي ڪيترن ئي نقطن تي شامل ٿيڻ جي ضرورت پوندي.
روسي پرڏيهي وزير سرگئي لاوروف چيو ته هن آمريڪا کي ٻڌايو ته نيٽو جي توسيع روس لاءِ سڌو خطرو آهي، پر آمريڪا-روسي سفارتي مشنن جي سڀني رڪاوٽن کي هٽائڻ، مفاهمت جو منصوبو تيار ڪرڻ، آمريڪا-روسي تعاون جي بحالي لاءِ شرطون مقرر ڪرڻ ۽ اقتصادي تعاون جي راهه ۾ رڪاوٽون هٽائڻ تي اتفاق ٿيو آهي.
0 تبصرے
Do not use vulgar language