سير تفريح تي پھتل جوڙي جو افسوسناڪ موت

القریات: (خمیس 20 فيبروري 2025ع)سعودي عرب جي شهر القريات ۾ پيش آيل هڪ افسوسناڪ واقعي کان پوءِ هر طرف سوگ جو ماحول پکڙجي ويو. هڪ سعودي جوڙو ريگستاني هنڌ تي لڳل خيمي ۾ مئل مليو. سعودي پريس ايجنسي جي هڪ رپورٽ موجب، جوڙي پاڻ کي ٿڌ کان بچائڻ لاءِ خيمي ۾ ڪوئلو ساڙيو. زهريلي گئس خيمي ۾ ڀرجڻ سان ٻنهي جو ساهه ٻوساٽجي ويو. رپورٽن موجب، نوجوان قبلان الشراري پنهنجي زال سان گڏ فطرت جي نظارن مان لطف اندوز ٿيڻ ۽ ٽرفل گڏ ڪرڻ لاءِ روڊ ذريعي سفر ڪرڻ جو ارادو ڪيو هو، ساڪا شهر کان 400 ڪلوميٽر اوڀر ۾ سفر ڪيو، جتي زندگي کيس وڌيڪ مهلت نه ڏني. ذريعن موجب، سعودي جوڙو پنهنجي خيمي ۾ مئل مليو، جوڙي رات جو سمهڻ کان اڳ خيمي ۾ ڪوئلي ٻاري ڇڏيا هئا. رپورٽن مطابق، سعودي عرب جي جنرل ڊائريڪٽوريٽ آف سول ڊفينس واقعي جي حوالي سان هڪ بيان جاري ڪيو آهي، جنهن ۾ چيو ويو آهي ته حفاظتي گهرجن کي نظر ۾ رکڻ کان سواءِ بند جڳهن ۾ ڪوئلي يا ڪاٺ کي ساڙڻ انتهائي خطرناڪ آهي. سول ڊفينس ان حوالي سان خبردار ڪيو آهي ته ڪوئلي کي ساڙڻ سان پيدا ٿيندڙ ڪاربان مونو آڪسائيڊ گيس بي رنگ، بي ذائقو ۽ بي بوءِ آهي، جيڪا هڪ خاموش خطرو (قاتل) بڻجي ويندي آهي. ان جي ڪري ماڻهو ڪجهه منٽن اندر هوش وڃائي ويهندو آهي، ۽ هي گئس موت جو سبب بڻجي ٿي. مسلمان عورتن تي حملا، آسٽريليا جو مسلمانن بابت ٻٽو معيار؟ سول ڊفينس موجب، حفاظتي خاصيتن سان ليس اليڪٽرڪ ۽ گيس هيٽر استعمال ڪرڻ گهرجن، جيڪي جديد ۽ محفوظ هجن ۽ جان ۽ مال جي حفاظت کي يقيني بڻائين.