چيمپيئنز ٽرافي جي افتتاحي ميچ ۾ نيوزيلينڊ پاڪستان کي 60 رنسن تان شڪست ڏئي ڇڏي

ڪراچي: (اربع 19 فيبروري 2025ع)آءِ سي سي چيمپيئنز ٽرافي 2025 جي افتتاحي ميچ ۾ نيوزي لينڊ ميزبان پاڪستان کي 60 رنسن تان شڪست ڏئي ڇڏي. ڪيويز جي 321 رنسن جي هدف جي جواب ۾، پاڪستاني ٽيم 48 هين اوور ۾ 260 رنسن تي ڍير ٿي وئي. ان کان اڳ، ڪراچي جي نيشنل اسٽيڊيم ۾ کيڏيل ميچ ۾، قومي ٽيم جي ڪپتان محمد رضوان ٽاس کٽي مهمان ٽيم کي بيٽنگ جي دعوت ڏني. نيوزي لينڊ پاڪستان خلاف پهرين بيٽنگ ڪندي مقرر 50 اوورن ۾ 5 وڪيٽن جي نقصان تي 320 رنسون ٺاهيون. جڏهن نيوزيلينڊ جي پهرين وڪيٽ 39 رنسن تي ڪري پئي ته ابرار احمد پاڪستان کي پهرين ڪاميابي ڏياري، ڊيون ڪون وي کي ابرار احمد 10 رنسن تي بولڊ ڪيو. بعد ۾ نسيم شاهه ڪين وليمسن کي صرف 1 رن تي آئوٽ ڪيو، وليمسن کي وڪيٽن جي پويان محمد رضوان هٿان ڪيچ آئوٽ ڪيو ويو. ٽئين وڪيٽ حارث رئوف ورتي، جنهن ڊيرل مچل کي آئوٽ ڪيو، جيڪو 10 رنسون ٺاهي چڪو هو. ول ينگ 107 رنسن جي شاندار اننگز کيڏي، کيس نسيم شاهه 107 رنسن تي آئوٽ ڪيو. گلين فلپس کي حارث رئوف آئوٽ ڪيو، هن 39 بالن تي 61 رنسن جي اننگز کيڏي. ٽام ليٿم 118 رنسن جي ناقابل شڪست اننگز کيڏي. ٽام ليٿم جي اننگز ۾ ٽي ڇڪا ۽ 10 چوڪا شامل هئا. قومي ٽيم هدف جي تعاقب ۾ سست شروعات ڪئي. آئوٽ ٿيندڙ پهريون پاڪستاني بيٽسمين سعود شڪيل هو، جيڪو 6 رنسون ٺاهڻ کان پوءِ آئوٽ ٿيو. ڪپتان رضوان به 22 جي مجموعي اسڪور تي پويلين موٽيو، هن 3 رنسون ٺاهيون هيون. پاڪستان جي ٽئين وڪيٽ 69 رنسن تي ڪري پئي جڏهن فخر زمان 24 رنسن تي آئوٽ ٿيو. آئوٽ ٿيندڙ چوٿون پاڪستاني رانديگر سلمان آغا هو، جنهن مزاحمت ڪرڻ جي ڪوشش ڪئي، پر هو به 28 بالن تي 42 رنسون ٺاهڻ کان پوءِ پويلين واپس هليو ويو. سندس پٺيان ايندڙ طيب طاهر به جلد ئي پنهنجي وڪيٽ وڃائي ويٺو ۽ هڪ رن تي آئوٽ ٿي ويو. ان کان پوءِ بابر اعظم به 153 جي مجموعي اسڪور تي آئوٽ ٿيو. بابر اعظم 90 بالن تي 64 رنسن جي اننگز کيڏي. پاڪستان جي ستين وڪيٽ 200 رنسن تي ڪري پئي، شاهين شاهه آفريدي 14 رنسن تي آئوٽ ٿيو، ان کان پوءِ خوشدل شاهه، جنهن 49 بالن تي 69 رنسن جي اننگز کيڏي. پاڪستان جي نائين وڪيٽ 260 رنسن تي ڪري پئي جڏهن حارث رئوف 19 رنسن تي آئوٽ ٿيو، نسيم شاهه 13 رنسن تي آئوٽ ٿيو. نيوزي لينڊ لاءِ مچل سينٽنر ۽ ول اورورڪ 3-3 وڪيٽون ورتيون، ميٽ هينري 2 وڪيٽون ورتيون، جڏهن ته مائيڪل بريس ويل ۽ نيٿن سمٿ هڪ-هڪ وڪيٽ ورتي. نيوزي لينڊ جي ٽام ليٿم کي سندس شاندار بيٽنگ تي ميچ جو بهترين رانديگر قرار ڏنو ويو. هو 118 رنسن تي ناٽ آئوٽ رهيو، سندس اننگز ۾ 3 ڇڪا ۽ 10 چوڪا شامل هئا. ياد رهي ته پاڪستان ۾ 29 سالن کان پوءِ آءِ سي سي جو ڪو ايونٽ منعقد ٿي رهيو آهي. ميچ جي شروعات کان اڳ، آءِ سي سي چيمپئنز ٽرافي جي افتتاحي تقريب ۾ پاڪستان ايئر فورس پاران فلائي پاسٽ ڪيو ويو. پاڪستان ايئر فورس جي شيردل ٽيم آسمان ۾ سائي هلال جهنڊي جا رنگ پکيڙي پاڪستاني قوم کي سلامي ڏني. ان کان علاوه، شيردل ٽيم پڻ پنهنجي پيشيورانه صلاحيتن جو مظاهرو ڪيو ۽ شاهين بريڪ پيش ڪيو. جي ايف 17، ايف 16 ۽ شيردل شاهين سڄي قوم جي دلين کي گرمايو، جڏهن ته جي ايف 17 ٿنڊر جهاز پڻ فلائي پاسٽ ۾ حصو ورتو.