راولپنڊي:(سومر 03 آگسٽ 2025ع)پي ٽي آءِ باني چيئرمين عمران خان طرفان خيبرپختونخواهه جي وڏي وزير علي امين گنڊاپور کي عهدو ڇڏڻ بابت بيان تي ڪي پي ڪي جي وڏي وزير جي ترجمان جو رد عمل سامهون اچي ويو آهي.
خيبرپختونخواهه جي وڏي وزير جي ترجمان فراز مغل پنهنجي بيان ۾ چيو ته خيبرپختونخواهه حڪومي پي ٽي آءِ باني جي وزن جي نمائنده آهي، پي ٽي آءِ باني جڏهن چاهيندو وڏو وزير عهدو ڇڏي ڏيندو.
هن چيو ته علي امين گنڊاپور حڪومت بابت پي ٽي آءِ باني جي پيغام جي ڪنهن پڪي ذريعي کان تصديق ناهي ٿي. علي امين گنڊاپور ڪيترائي ڀيرا چئي چڪو آهي ته ڪي پي حڪومت پي ٽي آءِ باني جي امانت آهي. هن چيو ته علي امين گنڊاپور وڏو وزير هجڻ جي باوجود اڊياله جيل ۾ پنهنجي اڳواڻ سان نٿو ملي سگهي. عدالتن طرفان حڪم به موجود آهن پر آئين ۽ قانون جي پاسداري نٿي ڪئي وڃي.
وڏي وزير جي ترجمان چيو ته علي امين گنڊاپور خيبرپختونخواهه ۾ امن امان جي قيام لاءِ قدم کڻي رهيو آهي، دهشتگردي جي خاتمي لاءِ علاقائي سطح تي قبائلي جرڳن جي شروعات ڪئي وئي آهي.
فراز مغل چيو ته گذريل ڏينهن وزيراعليٰ هائوس ۾ قبائلي اڳواڻن جو جرڳو منعقد ڪيو ويو، جرڳن کان پوءِ هڪ گرينڊ قبائلي مشاورتي جرڳو جوڙيو ويندو. ياد رهي ته گذريل ڏينهن عمران خان جو هڪ بيان سامهون آيو هو جنهن ۾ هن چيو هو ته علي امين گنڊاپور جيڪڏهن خيبرپختونخواهه ۾ امن قائم نٿو ڪري سگهي ته عهدي تان استعيفيٰ ڏئي ڇڏي. ذريعن موجب عمران خان جو چوڻ هو ته علي امين گنڊاپور جيڪڏهن صوبي ۾ گورننس جا مسئلا حل نٿو ڪري سگهي ته ڪنهن ٻئي کي موقعو ڏيڻ گهرجي
0 تبصرے
Do not use vulgar language