نيويارڪ:(سومر11 آگسٽ 2025ع)گڏيل قومن ۾ پاڪستاني سفير عاصم افتخار جو چوڻ آهي ته غزه فلسطينين جو آهي ۽ انهن جو ئي رهندو. پاڪستان غزه تي قبضي جي اسرائيلي منصوبي جي سخت مخالفت ڪري ٿو.
غزه تي قبضي جي اسرائيلي اعلان تي گڏيل قومن جي سلامتي ڪائونسل جو هڪ غير معمولي هنگامي اجلاس منعقد ٿيو.
اجلاس ۾ گڏيل قومن جي عملدارن، برطانوي، فرانسيسي ۽ ٻين ملڪن غزه تي اسرائيلي قبضي کي وڌيڪ خونريزي، تباهي ۽ انساني الميي جو سبب قرار ڏنو.
ان کان علاوه، اسرائيل کان مطالبو ڪيو ويو ته هو فوجي آپريشن بند ڪري غزه کي امداد تي پابندي فوري طور تي ۽ مستقل طور تي ختم ڪري.
پاڪستاني سفير عاصم افتخار چيو ته اسرائيل جو غزه تي قبضو ڪرڻ جو منصوبو اشتعال انگيز آهي. وزيراعظم اسرائيلي منصوبي جي مذمت ڪئي آهي. غزه ۾ جاري اسرائيلي ظلم فوري طور تي ختم ٿيڻ گهرجن. عالمي برادري کي غزه ۾ نسل ڪشي کي روڪڻ لاءِ گڏيل ڪوششون ڪرڻ گهرجن.
عاصم افتخار چيو ته غزه فلسطينين جو آهي ۽ انهن جو ئي رهندو. پاڪستان غزه تي قبضي جي اسرائيلي منصوبي جي سخت مخالفت ڪري ٿو.
ٻئي طرف، گڏيل قومن ۾ آمريڪي نمائندي سلامتي ڪائونسل جي اجلاس کي غزه ۾ امن لاءِ آمريڪي ڪوششن کي سبوتاژ ڪرڻ جي ڪوشش قرار ڏنو.
0 تبصرے
Do not use vulgar language