ڪولمبيا يونيورسٽي فلسطين جي حق ۾ احتجاج ڪندڙ شاگردن کي نيڪالي ڏيڻ جو اعلان ڪري ڇڏيو

واشنگٹن:(اربع 23 جولاءِ 2025ع)آمريڪا ۾ ڪولمبيا يونيورسٽي فلسطين جي حق ۾ احتجاج ۾ حصو وٺندڙ شاگردن خلاف تاديبي ڪارروائي جو اعلان ڪيو آهي. آمريڪي نيوز ايجنسي جي مطابق، شاگردن جي هڪ سرگرم گروپ چيو آهي ته لڳ ڀڳ 80 شاگردن کي هڪ کان ٽن سالن لاءِ معطلي جا نوٽيس موڪليا ويا آهن يا انهن کي يونيورسٽي مان ڪڍيو ويو آهي. ڪولمبيا يونيورسٽي پاران جاري ڪيل بيان موجب، عدالتي بورڊ پڻ تاديبي ڪارروائي ڪندي شاگردن جي ڊگريون رد ڪرڻ جو چيو آهي. هي قدم هڪ اهڙي وقت ۾ آيو آهي جڏهن ڪولمبيا يونيورسٽي ٽرمپ انتظاميا سان 400 ملين ڊالر جي وفاقي فنڊنگ کي بحال ڪرڻ لاءِ ڳالهيون ڪري رهي آهي، جيڪا ٽرمپ انتظاميا غزه خلاف احتجاج ۾ حصو وٺندڙ شاگردن جي سنڀال تي يونيورسٽي کان روڪي ڇڏي هئي. ان کان پوءِ، يونيورسٽي ٽرمپ انتظاميا پاران پيش ڪيل ڪيترن ئي شرطن تي راضي ٿي وئي آهي، جنهن ۾ شاگردن جي خلاف تاديبي عمل جي مڪمل نظرثاني ۽ سام دشمني جي نئين تعريف شامل آهي. يونيورسٽي چيو ته اسان جي اداري کي پنهنجي برادري لاءِ هڪ تعليمي مشن فراهم ڪرڻ تي ڌيان ڏيڻ گهرجي ۽ اهڙو ماحول پيدا ڪرڻ لاءِ جتي تعليمي برادري ترقي ڪري سگهي، هڪ ٻئي ۽ اداري جي بنيادي ڪم، پاليسين ۽ ضابطن جو احترام ڪرڻ ضروري آهي. ڪولمبيا يونيورسٽي آمريڪي يونيورسٽي ڪيمپس تي غزه جنگ جي خلاف احتجاجن ۾ اڳڀرائي رهي آهي. گذريل سال اپريل ۾، يونيورسٽي جي شاگردن ڪيمپس تي هڪ احتجاجي ڪئمپ قائم ڪئي، جنهن کان پوءِ احتجاج آمريڪا جي ڪيترن ئي يونيورسٽين ۾ پکڙجي ويو. جنوري ۾ اقتدار سنڀالڻ کان وٺي، ڊونلڊ ٽرمپ ڪيترن ئي اعليٰ آمريڪي يونيورسٽين جي فنڊنگ ۾ گهٽتائي ڪئي آهي جن کي هو يهودي مخالف رويو رکندڙ سمجهندو هو. اهو ياد رکڻ گهرجي ته ڪولمبيا يونيورسٽي جي گريجوئيٽ شاگرد ۽ سماجي ڪارڪن محمود خليل کي فلسطين جي حامي احتجاجن ۾ حصو وٺڻ تي حراست ۾ ورتو ويو هو. محمود خليل اميگريشن ايجنٽن پاران سندس گرفتاري لاءِ ٽرمپ انتظاميه خلاف 20 ملين ڊالر جو ڪيس داخل ڪيو آهي.