پشاور:(اڱارو 15 جولاءِ 2025ع)اليڪشن ڪميشن جي سيڪريٽري خيبرپختونخوا جي وڏي وزير کي خط لکي ڄاڻايو آهي ته ڪي پي اسيمبلي جي اسپيڪر نون ميمبرن جي حلف برداري لاءِ اجلاس نه گهرايو آهي، هاڻي گورنر پنهنجي صوابديد تي هي اجلاس سڏائي سگهي ٿو.
اليڪشن ڪميشن جي سيڪريٽري پاران ڪي پي جي وڏي وزير کي لکيل خط ۾ چيو ويو آهي ته 2 جولاءِ 2025 تي عورتن ۽ غير مسلمن لاءِ مخصوص سيٽن تي ڪامياب اميدوارن جو نوٽيفڪيشن جاري ڪيو ويو هو. انهن ميمبرن اڃا تائين حلف نه کنيو آهي، تنهن ڪري اهي اسيمبلي جي اجلاس ۾ حصو نه ٿا وٺي سگهن ۽ نه ئي ووٽ ڏئي سگهن ٿا.
خط ۾ چيو ويو آهي ته صوبي ۾ سينيٽ جون چونڊون 21 جولاءِ تي ٿيڻيون آهن، اسپيڪر کي چونڊيل ميمبرن کان حلف وٺڻ جي درخواست ڪئي وئي هئي، پر اسپيڪر انڪار ڪندي چيو ته اسيمبلي جو اجلاس جاري نه آهي ۽ هو اجلاس نه ٿو سڏائي سگهي.
خط ۾ چيو ويو آهي ته آئين جي آرٽيڪل 109 جي مطابق گورنر کي اختيار آهي ته هو پنهنجي صوابديد تي صوبائي اسيمبلي جو اجلاس سڏائي. آرٽيڪل 105 ۾ چيو ويو آهي ته گورنر وڏي وزير يا ڪابينا جي صلاح سان پنهنجون آئيني ذميواريون نڀائيندو.
خط ۾ وڌيڪ چيو ويو آهي ته پشاور هاءِ ڪورٽ 27 مارچ 2024 جي فيصلي ۾ پنهنجي راءِ ڏني آهي ته صوبائي حڪومت اسيمبلي اجلاس لاءِ سڀ ضروري قدم کڻندي.
ٻئي طرف، خيبرپختونخواهه جي گورنر فيصل ڪريم ڪنڊي، جيو نيوز سان ڳالهائيندي چيو ته کيس اڃا تائين وڏي وزير کان اسيمبلي اجلاس سڏائڻ لاءِ صلاح نه ملي آهي.
هن چيو ته مخصوص سيٽن تي چونڊيل ميمبرن کي اسيمبلي جي ميمبرشپ جو حلف کڻڻو پوندو. انهن ميمبرن کي سينيٽ جي چونڊن ۾ ووٽ ڏيڻو پوندو. وڏي وزير کي جلد اسيمبلي اجلاس جي صلاح موڪلڻ گهرجي ته جيئن اهي ميمبر حلف کڻي سگهن.
0 تبصرے
Do not use vulgar language