وفاقي حڪومت جو قرض ملڪي تاريخ جي نئين بلند ترين سطح تي پهچي ويو

اسلام آباد:(آچر 06 جولاءِ 2025ع)وفاقي حڪومت جو قرض ملڪ جي تاريخ ۾ هڪ نئين بلند ترين سطح تي پهچي ويو آهي. اسٽيٽ بينڪ آف پاڪستان مئي 2025 تائين وفاقي حڪومت جي قرضن جا ڊيٽا جاري ڪيا آهن. اسٽيٽ بينڪ جي دستاويز موجب، گذريل مالي سال جي پهرين 11 مهينن دوران، جولاءِ 2024 کان مئي 2025 تائين، وفاقي حڪومت جي قرض ۾ 7,131 ارب رپيا واڌ ٿي، جڏهن ته اپريل 2025 جي مقابلي ۾، مئي 2025 جي هڪ مهيني ۾ مرڪزي حڪومت جي قرض ۾ 1,109 ارب رپيا واڌ ٿي. دستاويز موجب، جون 2024 کان مئي 2025 تائين هڪ سال ۾، وفاقي حڪومت جي قرض ۾ 8,312 ارب رپين جو اضافو رڪارڊ ڪيو ويو. مئي 2025 تائين، وفاقي حڪومت جي قرض جو حجم 76,045 ارب رپيا هو، جنهن مان مقامي قرض 53,460 ارب رپيا ۽ ٻاهرين قرض 22,585 ارب رپيا هو.